Medin

Medin («lidn»), oficialižeks arab.: المدينة المنورة Al' Madīna Al' Munavvara («hoštai lidn», «vauktastadud lidn»), om lidn Saudan Arabijan päivlaskmas. Se om valdkundan nellänz' lidn eläjiden lugun mödhe, islaman toine pühälidn Mekkan jäl'ghe (kudamb om 450 km suvhe), Medinan agjan administrativine keskuz.

Medin
المدينة المنورة
(Al' Madīna Al' Munavvara)

Valdkund	Saudan Arabii
Eläjiden lugu (2010)	1,180,770 ristitud
Pind	589 km²
Telefonkod	+966-
Aigvö	UTC+3

Istorii

Eländpunktan aluz om pandud 9. voz'sadal EME Jasrib-nimitusenke. Pol'tošt tuhad vozid se oli kaikiš suremb evrejine keskuz Arabijan pol'sarel. Arabalaižed eliba siš-žo oazisas, no 6. voz'sadale heiden vähembuz ei olend kožmuses evrejiženke ristitištonke. Vl 622 Muhammad-endustai sirdi Medinha Mekkaspäi, i siš kurospäi (hidžra) islamanuskojiden era lugese. Medin kändihe Araban halifatan ezmäižeks pälidnaks (630−656). Muhammadan pert' tegihe islaman ezmäižeks pühäpertikš (mečetikš).

Nügüd'aigaine Medin om pühämatknikoiden keskuz kaikes mail'maspäi, lidnas da sen ümbrištos om äi mečetid.

Geografijan andmused

Klimat om tropine letetazangišton, om räk lujas päiči tal'ven koumes kus. Paneb sadegid 49 mm vodes, enamba sulakus (11 mm). Nepsuz om luja Rusttan meren lähembusen tagut.

Vl 2010 eläjiden lugu oli 1 180 770 ristitud, agjan kaks' koumandest. Kaik eläjad oma islamanuskojad, i vaiše mugomile ristituile sab olda Medinas.

Irdkosketused

• Lidnan da Medinan agjan oficialine sait (amana-md.gov.sa). (arab.)