Mari

Mari (turkmen.: Mary [marɯ], edel 1937. vot Merv) om lidn, avtote- da raudtesol'm Turkmenistanan suvipäivnouzmas. Se om valdkundan nellänz' lidn eläjiden lugun mödhe, Marin agjan administrativine keskuz.

Mari
Mary

Valdkund	Turkmenistan
Eläjiden lugu (2010)	126,000 ristitud
Telefonkod	+993−522
Aigvö	UTC+5

Istorii

Eländpunktan aluz om pandud lidnan statusanke vl 1884 kuti Venäman imperijan soda- da administrativine keskuz 30 km päivlaskmha amuižes persijankel'žes Merv-lidnusespäi, Murgaban oazisan tekinižen lidnusen sijha. Vspäi 1890 oli makundan keskuseks Kaspijantagaižes agjas.

Kätihe Marid agjan keskuseks vn 1939 21. päiväl kül'mkud. Vll 1963−1970 agj oli tühjitadud, i sil aigal lidn oli rajonan keskusen. Nevondkundaližiden sodavägiden baz oli Mariš hätken aigan.

Geografijan andmused

Eländpunkt sijadase 17 m ü.m.t. keskmäižel korktusel. Karakuman kanal ümbärdab lidnan suviröunoid, Murgab-jogi lankteb sihe.

Vl 1989 eläjiden lugu oli 92 290 ristitud. Kaikiš suremb ristitišt om nügüd'.

Ižanduz

Lidn da sen lähine ümbrišt om valdkundan energetine keskuz. Londuseližen gazan samine, Marin GRES kävutab sidä poltuseks i tegeb Turkmenistanan elektrusen nell' videndest.

Nened edheotandad ratas lidnas: mašinansauvomižen (kivivoinpompad) i azotheretusiden tegimed, pertinsauvondan i sauvondmaterialiden kombinatad, sömtegimišt (sahartegim, konditerine fabrik, oluden i maidon tegimed) i tekstiline sarak (puvillanpuhtastandtegim, nahktegim, kangazfabrik, omblendfabrik, kouriden fabrik) oma šingotadud, mugažo mebel'fabrik om olmas.