Lomonosov (lidn)

Lomonosov (ven.: Ломоно́сов, suom.: Lomonosov) om Venäman lidn da meriport Piterin röunoiš. Vspäi 2011 om Venäman sodahoštusen lidnaks. Se mülüb Petrodvorecan rajonha, otab sen päivlaskmašt palad. Mugažo Leningradan agjan Lomonosovan rajonan ohjandusen aluzkundad sijadasoiš lidnas.

Lomonosov
Ломоносов

Lidnanznam	Flag
Valdkund	Venäma
Eläjiden lugu (2023)	39,088 ristitud
Pind	35 km²
Pämez'	Nadežda Smol'nikova (reduku 2019—)
Telefonkod	+7−812-xxx-xx-xx
Avtokod	78, 98, 178, 198
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Lidnan sijaduz Piter-regionan kartal (2006)

Istorii

Eländpunktan aluz om pandud vl 1710 kuti Menšikovan pert'kulu lähiženke tahondanke. Vspäi 1727 sen nimi lähevenujanke žilonke oli Oranijenbaum (ven.: Ораниенба́ум, saks.: Oranienbaum, suom.: Kaarosta, Rampova), raudtestancijoiden nimed (Oranijenbaum I i Oranijenbaum II) oma mugoižed tähäsai. Žilo sai lidnan statusad vl 1780. Vl 1948 udesnimitihe lidnad nügüdläižikš Mihail Lomonosov-tedomehen kanzannimen mödhe.

Lomonosov-lidn šingotase ladimensauvomižel, raudten passažirvagonoiden südäimen tehmižel, sauvondmaterialiden edheotandoil (mecan ümbriradmine).

Geografijan andmused

Lidn sijadase Suomen lahten suvirandal, Karast-jogensus (ven.: Караста). Matkad Piterin keskushesai om 30 km päivnouzmha orhal. Lähembaižed lidnad oma Piterin regionan Petergof suvipäivnouzmha i Kronštadt pohjoižhe.

Eläjad

Vn 2010 Venäman rahvahanlugemižen mödhe lidnan eläjiden lugu oli 42 505 ristitud. Kaikiš suremb lidnan ristitišt oli 43 300 eläjad vl 1979 i 43 182 eläjad vl 2017, vajehtihe 42..43 tuh. eläjid röunoiš vll 2010−2020.

Ortodoksižen hristanuskondan kaks'toštkümne pühäpertid oma kaičenus i saudud lidnas: ph. Mikoi-arhangelan päjumalanpert', seičeme jumalanpertid, kodijumalanpert' i koume časounäd. Niiden ližaks nell' jumalanpertid ei ole kaičenus.

Sodamerilaivišton Lomonosovan merikolledž om lidnan professionaližen opendusen aluzkundaks.

Municipaližen ühtnikan pämez' om sen Nevondkundan ezimez'. Edeline municipalitetan pämez' om Aleksandr Kornejev (viluku 2017 — reduku 2019).

Transport

Kaks' raudteplatformad (Martiškino, Kronštadtan Kolonii) oma kahten raudtestancijan ližaks, ezilidnelektrojonused ühtenzoittas lidnad Baltijan päraudtestancijanke. Avtobusad oma kundaližeks transportaks lidnan südäimes. Bronk-meriport (ven.: Бронка) om saudud jüguiden täht, se radaškanzi vn 2015 lopus, Piterin Suren portan üks'jäine terminal suriden laivoiden täht (ujudas 13 metrhasai süvütte).

Lähembaine metro om Avtovo- da Kirovskii zavod-metrostancijad, avtobusad ühtenzoittas lidnad niidenke.

Galerei

• 
  Sijaližen administracijan sauvuz (2016)
• 
  Mikoi-arhangelan päjumalanpert', vn 2012 nägu
• 
  Lomonosovan punümbriradai tegim vl 2015
• 
  Kul'turkeskuz (2017)
• 
  Oranijenbaum I-raudtestancii vl 2009

Irdkosketused

• Municipaližen ühtnikan tobmuden aluzkundoiden oficialine sait (mo-lomonosov.ru). (ven.)