Kovilkino

Kovilkino (ven.: Ковы́лкино, erz.: Ковёл, mokš.: Лашма Ош) om Venäman lidn Mordovijan Tazovaldkundan keskuzpalan suves. Se om lidnankundan i Kovilkinon rajonan (vspäi 1928) administrativine keskuz.

Kovilkino
Ковылкино (ven.)
Ковёл (erz.)
Лашма Ош (mokš.)

Lidnanznam
Valdkund	Venäma
Eläjiden lugu (2021)	19,793 ristitud
Pind	40,56 km²
Pämez'	Roman Šiškaev (sulaku 2022—, velgusentäutai)
Telefonkod	+7−83 453-xx-xxx
Avtokod	13, 113
Aigvö	UTC+3 (MSK+0)

Istorii

Necil territorijal kaikiš vanhemb eländpunkt oli Lašm vspäi 1237. Nügüdläižen eländpunktan aluz om pandud vl 1892 kuti Arapovo-raudtestancii «Räzan' — Kazan'»-jonol, nimitihe Arapovad-pomeššikoiden-manpidajiden kanzannimen mödhe. Vl 1919 udesnimitihe stancijad da eländpunktad senno nügüdläižikš, raudteiden Stepan Kovilkin-komissaran kanzannimen mödhe. Kätihe Kovilkinod radnikžiloks vn 1940 semendkus. Radnikžilo sai lidnan statusad vn 1960 3. päiväl kül'mkud.

Kovilkinon tegimišt om söndtavaroiden pästandan edheotandad (leibtegesiden, etilspirtan, argvoin da saguden tegimed), sauvondmaterialiden tehmine (silikatižed savičud da blokad, faner), elektromehanine tegim (likujad radiolokatorad, dizel'elektrostancijad), kombisötken tegim.

Geografijan andmused

Lidn seižub penen Lašm-jogen lanktendan sijas Mokš-jogehe (ven.: Лашма 17 km pitte, Okan oigedpol'ne bassein), Mokš-jogen hural randpolel, 140 m ü.m.t. keskmäižel korktusel.

Matkad Saranskhasai om 85 km päivnouzmha orhal vai 108 km avtotedme. Lähembaižed lidnad oma Insar 38 km suvipäivnouzmha avtotedme, Spassk (Penzan agj) 49 km päivlaskmha orhal vai 87 km avtotedme i Krasnoslobodsk 53 km pohjoižhe avtotedme.

Tobmuz

Pen' Sosnovii Bor-žilo (37 rist. vl 2016) mülüb lidnankundha Kovilkinon ližaks, sijadase viden kilometras päivnouzmha lidnaspäi.

Lidnankundan Administracijan edeline pämez' om Igor' Ovsänickii (viluku 2010 — kezaku 2021).

Eläjad

Vl 1959 eländpunktan ristitišt oli 10 484 eläjad, vl 1967 — 15 000 eläjid, vl 1979 — 19 996 eläjad. Vn 2010 kaiken Venäman rahvahanlugemižen mödhe lidnan eläjiden lugu oli 21 307 ristitud, rajonan ristitišton pol', vn 2021 — 19 793 ristitud. Kaik 20 072 eläjad oli lidnas vl 2017. Kaikiš suremb lidnan ristitišt oli 23 200 eläjad vozil 1996−2000.

Ortodoksižen hristanuskondan koume jumalanpertid oma saudud da avaitud lidnas: ph. Serafim Sarovalaižen (pühästihe vl 1993), Jumalanmaman «Mujatuz»-jumalaižen (om saudud vll 1995−2000), Mikoi-arhangelan (vspäi 2005).

Lapsiden opendusen aluzkundad oma severz'-se päivkodid, viž keskškolad, muzikškol, čomamahtoine škol, sportškol. Professionaližen opendusen aluzkundad oma Kovilkinon agrariž-sauvondkolledž i Mordovijan valdkundaližen universitetan Kovilkinon filial.

Galerei

• 
  Kovolkinon kodirandantedištandmuzei (2010)
• 
  Muzikškol lapsiden täht (2020)
• 
  Sodamuštnikad (2015)
• 
  Kovilkino-päraudtestancijan sauvuz vl 2019

Irdkosketused

• Lidnan tobmuden sait (admkovilkino.ru). (ven.)
• Lidnankundan lehtpol' Kovilkinon rajonan tobmuden oficialižel kovilkino13.ru-saital. (ven.)