Ičan

Ičan (kit.: 宜昌市, pin'jin': Yíchāng) om Kitain lidn Hubei-agjas. Se om agjan kahtenz' lidn eläjiden lugun mödhe (administrativižen Uhan'-keskusen jäl'ghe).

Ičan
宜昌市

Valdkund	Kitai
Eläjiden lugu (2010)	1,411,380 ristitud
Pind	4,232,4 km²
Pämez'	Ma Süimin
Telefonkod	+86−717
Aigvö	UTC+8

Ičanan lidnümbrikon sijaduz agjas (2018)

Istorii

Eländpunkt om erigoittud lidnan statusanke Ičan-makundaspäi Kitain Rahvahaližen Tazovaldkundan sädandan jäl'ghe vl 1949. Ičanan lidnümbrik om sätud vl 1992.

Ičan šingotase laivansauvomižel. Sepoiden, himižiden heretusiden i aerokosmižen industrijan tegimed ratas lidnümbrikos.

Geografijan andmused

Lidn sijadase valdkundan keskuzpalan suves, agjan päivlaskmaižes poles, Janczi-jogen hural randal tobjimalaz. Kaks' järedad padoseinäd da gidroelektrostancijad oma saudud ülezjogen: «Gečžouba» (om saudud vozil 1971−1988) ani lidnan pohjoižen röunan taga i kaikiš suremb mail'mas vägevuden mödhe «San'sä» (Koume urad, 22,5 GVt, om saudud vll 1994−2012) 50 kilometras lodeheze Ičan-lidnaspäi.

Klimat om subtropine, pil'vesekaz vodes läbi. Voden keskmäine lämuz om +17,3 C°, kezakun-elokun +25,8..+28,1 C°, tal'vkun-uhokun +5,0..+7,6 C°. Ekstremumad oma −9,8 C° (viluku) i +41,4 C° (heinku, eloku). Voib panda halad kül'mkus-keväz'kus. Paneb sadegid 1140 mm vodes, enamba heinkus-elokus (191..211 mm kus), vähemba tal'vkus-vilukus (19..24 mm kus). Kun keskmäine relätivine nepsuz vajehtase 72..79 % röunoiš voden aigan.

Eläjad

Vl 2010 Ičanan lidnümbrikon eläjiden lugu oli 4 059 686 ristitud 21 338 km² pindal.

Znamasine üläopendusen aluzkund om Kitain Koumen uran universitet (kit.: 三峡大学, angl.: China Three Gorges University, CTGU), se om sätud vl 2000 kahten üläopendusen aluzkundan ühtištusel. Kaik läz 20 tuhad üläopenikoid om universitetas, hö opetas 24 kolledžas i profškolas.

Transport

Lidnan kundaližen transportan verk (2015)

Lidn ühtenzoitase agjan Uhan'-keskusenke raudtedme. Port radab Janczi-jogen randal.

Rahvahidenkeskeine civiline Ičan San'sä-lendimport (Koume urad, YIH / ZHYC, 3 mln passažiroid vl 2018) om saudud lidnan suves vll 1994−1996, 26 kilometras lidnan keskuzpalaspäi. Tehtas reisid Kitain äjihe surihe lidnoihe, om čarterreisid Filippinoihe.

Irdkosketused

• Lidnan oficialine sait (yichang.gov.cn). (kit.) (angl.)