Čagod

Čagod
Чагода
Valdkund	Venäma
Eläjiden lugu (2023)	5,603 ristitud
Telefonkod	+7−81 741-xx-xxx
Avtokod	35
Aigvö	UTC+3 (MSK+0)

Čagod (ven.: Ча́года) om Venäman lidnanvuitte žilo Vologdan agjan suvipäivlaskmas. Se om Čagodoščan ümbrikon (edel vn 2022 kezakud — rajonan) administrativine keskuz da kaikiš suremb eländpunkt.

Istorii vajehta

Eländpunktan aluz om pandud vl 1926 kut Belii Bičok-sijaine (Vauged Härgvaza) sauvomha Čagodoščan stökoltegint Čagod-radnikžilonke. Panihe žilon alust mecmassivan sijha. Nece oli ühteks ezmäižiš mugoižiš projektoišpäi Nevondkundaližes Ühtištuses — tegim radnikžilonke ühtes. Projektan tegii om Noi Abramovič Trockii Leningradaspäi.

Vspäi 1932 radnikžilo sai lidnanvuiččen žilon statusad i kändihe Üläčagodoščan rajonan administrativižeks keskuseks Vauktad Ristad-külän (ven.: Белые Кресты) jäl'ghe. Vl 1935 sirtihe rajonan keskust Vauktoihe Ristoihe tagaz. Vl 1939 udesnimitihe žilod jogen mödhe. Vspäi 1965 Čagod-žilo kändihe rajonkeskuseks möst.

Čagodan ižandusen sarakod oma stökolmülüiden pästand — AAS «Čagodoščenskii steklozavod i K»^[1] («Čagodoščan stöklantegim da K»), mecan varhapanend, torguindsarak.

Geografijan andmused vajehta

Territorialižen palakundan sijaduz ümbrikon kartal (2010)

Čagod om Vologdan agjan kaikiš päivlaskmaižemb rajonankeskuz. Žilo sijadase rajonan pohjoižes, sokahas tahondas, ühtennimižen jogen molembil randoil (hural tobjimalaz) sen oiktan Pes'-ližajogen lanktendan sijan jäl'ghe ani. Čagod-jogi nimitaze Čagodoščaks žilon jäl'ghe ani.

Matkad Vologdhasai om 260 kilometrad päivnouzmha orhal, 320 km avtotedme; Piterihesai om 295 i 356 km; Čerepovechasai om 148 i 204 km; om 380 km Surhe Uz'lidnhasai. Lähembaine lidn om Babajevo, 43 kilometrad pohjoižpäivnouzmha orhal, 73 km avtotedme. Lidnanvuitte Sazonovo-žilo om kümnes kilometras suvipäivlaskmha avtotedme.

Lidnankundan toine jogi om Lid', se om Čagodan hura ližajogi.

Klimat om ven. Tal'v om pehmed, keza om läm'.

Tobmuz vajehta

Čagodan lidnankund oli vll 2005−2022, žilo oli sen üks'jäižeks eländpunktaks. Lidnankundan pind oli 234,92 nellikkilometrad^[2]. Se om kätud ümbrikon territorialižeks palakundaks vn 2022 kezakuspäi.

Enččen municipaližen Čagod-ühtnikan Nevondkundan Natal'ja Basova-ezitai oli valitud da radoi sen ühtnikan pämehen vs 2016 elokuspäi. Varapämez' oli hänele abhu.

Kaik kümne ezitajad mülüiba municipaližen ühtnikan Nevondkundha (ven.: Совет муниципального образования). Valitihe heid järgenduseližen kerdan vn 2013 sügüz'kun 8. päiväl (koumanz' kucund)^[3]. Heiden valdatusiden strok oli nell' vot. Aleksei Murašov radoi sen ezimehen. Varapämez' oli hänele abhu.

Municipaližen ühtnikan administracii kogoni ühesas radnikaspäi.

Eläjad vajehta

Vn 2002 Venäman rahvahanlugemižen mödhe žilon eläjiden lugu oli 7 432 ristitud, vl 2010 — 6 919 ristitud, vn 2021 — 5 693 ristitud. Žilon kaikiš suremb ristitišt oli 10 844 eläjad vl 1959. Ümbrikon ristitišton pol' eläb žilos.

Hristanuskondan koume pühäpertid oma saudud da avaitud žilos: ortodoksižen hristanuskondan puižed jumalanpert' i časoun'^[4], baptizman uskojiden loičendpert'.

Lapsiden opendusen aluzkundad oma keskškol, čomamahtoiden škol, lapsiden sädamižen keskuz, lapsiden da norišton sportškol. Toižed büdžetižed aluzkundad oma istorijan da rahvahankul'turan muzei, ümbrikon kul'turkeskuz, sportan pert'kulu, keskuzkirjištsistem i keskuzpuišt.

Transport vajehta

Taksid oma kundaližeks transportaks žilon südäimes. Avtobusad ajeltas Vologdhasai, Čerepovechasai da Piterihesai joga päivän.

«Vologd — Uz' Ladog»-avtote (A114-trass) mäneb kahesas kilometras suvipäivlaskmha, avtotesarak ühtištoitab žilod senke. Ühtennimine Čagod-raudtestancii sijadase žilon päivlaskmas, se om «Kabož — Podborovje»-raudtel.

Galerei vajehta

Lämoipalodepo (2021)
Ph. Jevfrosin Sineozerskijan jumalanpert' ani sauvoundan vaumičendan jäl'ghe vl 2012
Čagodoščan stöklantegimen tulend vl 2015
Čagodan muzei (2015)
Lauk žilos vl 2015

Homaičendad vajehta

Irdkosketused vajehta

Čagod Vikiaitas

[1] Čagodoščan stöklantegimen sait (chszlp.ru). (ven.) (angl.)

[2] Общая площадь земель по муниципальным образованиям на 2015 год: Вологодская область (Maiden ühthine pind municipaližiden ühtnikoiden mödhe vl 2015: Vologdan agj). — Rosstat (gks.ru). (ven.)

[3] Выборы депутатов Совета муниципального образования посёлок Чагода Чагодощенского муниципального района (Municipaližen Čagod-ühtnikan Nevondkundan ezitajiden valičendad, Čagodoščan municipaline rajon). — Tedod mänijoiš valičendoiš da referendumiš (vybory.izbirkom.ru) // Venälaižen Federacijan keskuzline valičemižlaudkund. (ven.)

[4] Čagodan pühäpertid sobory.ru-saital. (ven.)

[1]

[2]

[3]

[4]