Vahdat

Vahdat (tadž.: Ваҳдат, ven.: Вахдат) om lidn tazovaldkundan alištusenke Tadžikistanan päivlaskmas. Se om Vahdatan rajonan tazovaldkundan alištusenke administrativine keskuz, mülüb sihe.

Vahdat
Ваҳдат

Valdkund	Tadžikistan
Eläjiden lugu (2022)	54,400 ristitud
Telefonkod	+992−3136
Aigvö	UTC+5

Istorii

Eländpunktan aluz om pandud kuti žilo vl 1927 Jangi-Bazar-nimitusenke. Raudte tuli sihe vl 1930. Vll 1936−1975 i 1992−2003 sen nimi oli Kofarnihon jogen mödhe. Vl 1975 anttihe lidnan statusad, nimitihe Ordžonikidzeabad oficialižikš.

Vahdat šingotase puvillan puhtastandtegimel, sauvondmaterialiden pästandal (pertinsauvond, savič, keramzit), šuukankombinatal, sömtegimištol (jauh), kohenduzmehanižel i metalltegesiden tegimil, mugažo meblin fabrik i lindferm ratas lidnas.

Geografijan andmused

Lidn sijadase Gissar-alangištos, Kafirnigan-jogen randal (tadž.: Кофарниҳон 387 km pitte, Amudarjan oiged ližajogi), 870 m ü.m.t. keskmäižel korktusel. Matkad Dušanbe-pälidnhasai om 19 km päivlaskmha.

Voden keskmäine lämuz om +13,7 C°, kezakun-elokun +24..+26 C°, tal'vkun-uhokun +1..+4 C°. Paneb sadegid 636 mm vodes, enamba keväz'kus-sulakus (114..118 mm kus), vähemba kezakus-sügüz'kus (1..11 mm kus).

Eläjad

Vn 2010 Tadžikistanan rahvahanlugemižen mödhe lidnan eläjiden lugu oli 40 600 ristitud. Kaik 317 100 ristitud elihe rajonas vl 2016.

Statistikan kolledž (tadž.: Коллеҷи омори шаҳри Ваҳдат, alusenpanend 1958) i medicinan kolledž ratas lidnas.

Irdkosketused

• Lidnan oficialine sait (vahdat.tj). (tadž.)