Tübingen

Tübingen (mugažo saksan kelel, virktas [ˈtyːbɪŋən]) om lidn Saksanman suves, Baden-Vürtemberg-federacijanman keskuzpalas.

Tübingen

Lidnanznam
Valdkund	Saksanma
Eläjiden lugu (2022)	92,811 ristitud
Pind	108,12 km²
Pämez'	Boris Pal'mer (viluku 2007—, Boris Palmer)
Telefonkod	+49−7071, 7073, 7472
Aigvö	tal'vel UTC+1, kezal UTC+2

Lidnan da sen ümbrišton kart (2019)

Istorii

Feodaline «Tübingen-lidnuz» mainitase ezmäižen kerdan vl 1078 kuti Hohentübingen (latin.: Tuingia i Twingia), konz Saksanman Henri IV-kunigaz oli ümbärtud i ištui täs. Tübingen-eländpunkt mainitase vspäi 1191. Vanh lidn om kaičenus tähäsai täuzin mail'man sodoiden jäl'ghe, siš ei olend järedad tegimištod.

Nügüd'aigan Tübingen šingotase turizman keskuseks. Lidnan struktur kožub jaugnikoidenke i velosipedistoidenke, om äi kovitadud tehuzid. Kaik 18 festivalid oleskeldas voden aigan fil'miden, sportan i sömän polhe, jarmankad. Om penid edheotandoid tekstilin, mašiništonsauvomižen, medicinižen tehnikan, rahvahanpramozloiden i biotehnologijoiden sarakoiš. Neniden kompanijoiden päfaterad sijadasoiš lidnas: «Walter AG» (frezad, pörkad), «Hugo Brennenstuhl» (kabel'mašiništ, detektorad, pidatimed, päiväižbatarejad) i «CHT-Gruppe» (himižed ližasubstancijad tekstiližen, sauvondan i ühthekeradamižen sarakoiš).

Geografijan andmused

Lidn sijadase Nekkar-jogen da sen ližajogiden randoil, 307 m ü.m.t. keskmäižel korktusel, Švabijan Al'ban lodehližen ezimägišton 515 metrhasai. Lähembaine järed lidn om Štuttgart 30 km pohjoižhe.

Klimat om ven. Voden keskmäine lämuz om +9 C°, heinkun i elokun +19 C°, tal'vkun..uhokun +1..+3 C°. Paneb sadegid 715 mm vodes, enamba semendkus-heinkus (75..91 mm kus).

Tobmuz

Tübingenan 23 lidnrajonad (saks. Stadtteil) vl 2009

Tübingenan municipalitet jagase 23 nimitadud fartalaks (üks'lugu saks.: Stadtteil), niiden kesken kümne oma lidnan irdpolel.

Eläjad

Vn 2001 Saksanman rahvahanlugemižen mödhe lidnan eläjiden lugu oli 82 444 ristitud, vn 2011 — 89 011. Kaik 87 464 eläjad oli lidnas vl 2015. Kaikiš suremb lidnan ristitišt om nügüd'.

Vl 2016 26,9 tuh. eläjid oliba üläopenikoikš. Eberhard-Karls-universitet (27,2 tuh. üläopenikoid 2019/20 openduzvodel) radab vspäi 1477, se om kaikiš amuižembiš valdkundas i om lidnan kaikiš järedambaks radonandajaks.

Irdkosketused

• Lidnan ohjastusen oficialine sait (tuebingen.de). (saks.) (angl.)