Sajanogorsk

Sajanogorsk (hak.: Наа Сойан Тура, ven.: Саяного́рск) om Venäman lidn da lidnümbrik Hakasijan Tazovaldkundan päivnouzmaižes sen röunanno. Se om Hakasijan koumanz' surtte lidn.

Sajanogorsk
Саяногорск (ven.)
Наа Сойан Тура (hak.)

Lidnanznam	Flag
Valdkund	Venäma
Eläjiden lugu (2021)	44,872 ristitud
Pind	19 km²
Pämez'	Jevgenii Molodnäkov (sügüz'ku 2022—)
Telefonkod	+7−39 042-xx-xxx
Avtokod	19
Aigvö	UTC+7 (MSK+4)

Istorii

Eländpunktan aluz om pandud vl 1830 kuti Označennoje-külä kaičemha Venäman röunad. Vozil 1965−1975 šingotihe sidä lidnanvuččeks žiloks sauvomha järedad gidroelektrostancijad, miše sada alüminijad. Vl 1975 žilo sai lidnan statusad nügüdläiženke nimenke.

Sajanogorsk ižandusen päsarakod oma alüminijan da sen ühthesuladusiden pästand (kaks' alüminijantegint), gidroenergetik (Sajanan-Šušenskojen GES vspäi 1978), mugažo alüminijasižen pakuitesen tegim i maidtegim ratas lidnas.

Geografijan andmused

Lidn sijadase Jenisei-jogen hural randal, Päivlaskmaižen Sajanan pautkidenno 300 m ü.m.t. korktusel, stepin zonas. Matkad Abakanhasai om 80 km pohjoižhe. Om ümbärtud Bejan rajonal.

Sajanogorsk jagase kümneks lidnanlaptaks. Lähižed lidnanvuiččed Čerömuški-žilo (7382 rist. vl 2021) i Main-žilo (ven.: Майна, 4325 rist. vl 2021) mülüdas lidnümbrikho Sajanogorskan ližaks.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 49 887 ristitud, lidnümbrikon — 63 322 ristitud. Vodele 2017 lidnan ristitišt poleni 47 983 eläjhasai, lidnümbrikon — 61 013 ristithusai. Kaikiš suremb lidnan ristitišt oli 56 tuhad eläjid vl 1996.

Ortodoksižen hristanuskondan koume pühäpertid oma letud lidnas: Eläban Eziauguižen Stroican jumalanpert' (letihe vll 1992−1999), Jumalanmaman Tulendan Pühäpertihe jumalanpert' (1997−2003, ei ole rados) i Jumalanmaman Nägundan Sergii Radonežalaižele časoun' (2011). Niiden ližaks koume jumalanpertid om lidnümbrikon žiloiš.

Sajanogorskan politehnine tehnikum i privatine «STEMI»-tehnikum oma lidnan professionaližen opendusen aluzkundoikš.

Edeližed lidnümbrikon pämehed (sen Administracijan pämehed) oma Mihail Valov (sügüz'ku 2018 — kezaku 2022) i Leonid Bikov (viluku 2004 — sügüz'ku 2018).

Galerei

• 
  Sajanan-Šušenskojen GES vl 2021
• 
  Sajanogorskan alüminijantegim («RUSAL»-kompanii) vl 2011
• 
  Sajanan STEMI-tehnikuman pätulend (2021)
• 
  Dizel'jonuz Sajanogorsk-raudtestancijal vl 2011
• 
  Dizel'jonuz Predzavodskai-raudtestancijal läz lidnad vl 2011

Irdkosketused

• Sajanogorsk-lidnan tobmuden aluzkundoiden oficialine sait (sayan-adm.ru). (ven.)