Marakaibo (lidn)

Marakaibo (isp.: Maracaibo [maɾaˈkaiβo]) om Venesuelan järed meriport, kahtenz' lidn eläjiden lugun mödhe. Se om Sulii-štatan administrativižeks keskuseks da palaks.

Marakaibo
Maracaibo

Lidnanznam	Flag
Valdkund	Venesuel
Eläjiden lugu (2020)	2,658,355 ristitud
Pind	550 km²
Pämez'	Adrian Romero (reduku 2024—, Adrián Romero Martínez)
Telefonkod	+58−261
Aigvö	UTC−4:30

Lidnan kart (2016)

Istorii

Nügüdläižen eländpunktan aluz om pandud 16. voz'sadal severz'-se kerdoid, saksalaižil kuti Noi-Nürnberg (saks.: Neu Nürnberg, 1529−1546), sid' ispanijalaižil kuti Nueva-Samor (isp.: Nueva Zamora, vll 1569 i 1574). Ezmäi indejižed heimod tegiba londoid verazmalaižiden žilho, sid' kaikel 17. voz'sadal merirazbainikad anastiba meriportad. Nell' voz'sadad alusenpanendan jäl'ghe saihe lidnhasai meritel vaiše.

Marakaibo šingotaškanzi kivivoin löudmižen jäl'ghe vl 1917 eksportiruimha sidä. Nened sarakod ratas lidnas: kivivoin da sen produktoiden transportiruind, kivivoin ümbriradmine, sauvondmaterialiden pästand, tekstil'edheotandad, sömtegimišt.

Geografijan andmused

Lidn sijadase valdkundan lodehes, sal'men 8..10 km levette päivlaskmaižel randal, kuz' metrad ü.m.t. keskmäižel korktusel. Sal'm ühtenzoitab ühtennimižen järven vezid Kariban meren Venesuelan lahtenke. Avtotesild om saudud sal'mes päliči vll 1958−1962.

Klimat om räk kuivahk. Kun keskmäine päiväline lämuz om +27..+29 C° vodes läbi. Paneb sadegid 580 mm vodes, kuiv sezon oleskeleb vilukus-keväz'kus (14 mm pordos).

Tobmuz

Lidnan tulendad vl 2013

Marakaibo jagase 18 nimitadud tulendaks.

Lidnan municipalitetan pämez' om alkal'd (isp.: Alcalde del Municipio Maracaibo). Edeližed lidnan pämehed oma Rafael' Ramires (Rafael Ramírez Colina, tal'vku 2021 — reduku 2024), Villi Kazanova (Willy Casanova, tal'vku 2017 — tal'vku 2021), Evelin Treho de Rosales (Eveling Trejo de Rosales, tal'vku 2010 — tal'vku 2017).

Eläjad

Vl 2001 lidnan eläjiden lugu oli 1 220 000 ristitud, vl 2013 — 2 001 591 ristitud 550 nellikkilometrad pindal. Kaikiš suremb lidnan ristitišt om nügüd'. Kaik 5 278 448 eläjad om ezilidnoidenke (kogonaine pind 1393 km²).

Transport

Avtobusad i maršruttaksid oma kundaližeks transportaks. Tramvaid ajadas lidnan palas turistoiden täht päpaloin. Vspäi 2006 kebnan metron jono radab (vspäi 2009 om 11 km raudted kudenke stancijanke).

Rahvahidenkeskeine soda- da civiline Činit-lendimport (isp.: Aeropuerto Internacional La Chinita, MAR / SVMC, 2,8 mln passažiroid vl 2008) sijadase 15 km suvipäivlaskmha lidnan keskuzpalaspäi. Sišpäi tehtas reisid Panam-lidnha i Majamihe, mugažo Venesueladme.