Belu Orizonti

Belu Orizonti (port.: Belo Horizonte [ˈbɛlu oɾiˈzõtʃi], sijaline [ˌbɛloɾiˈzõtʃi] «čoma taivhanröun») om lidn Brazilijan suvipäivnouzmas. Se om valdkundan kudenz' lidn eläjiden lugun mödhe, Minas Žerais-štatan administrativine keskuz.

Belo Orizonti
Belo Horizonte

Lidnanznam	Flag
Valdkund	Brazilii
Eläjiden lugu (2022)	2,315,560 ristitud
Pind	331,4 km²
Pämez'	Fuad Noman (keväz'ku 2022—)
Telefonkod	+55−31
Aigvö	UTC−3

Lidnan da sen ümbrišton kart (2014)

Istorii

Eländpunktan aluz om pandud vl 1701. Se sai lidnan statusad vl 1897. Om saudud genplanan mödhe augotišespäi.

Belu Orizonti šingotase raudan metallurgijal, himižel tegimištol (biodizelin pästand), sömtegimištol, sauvondmaterialiden tehmižel, mašinansauvomižel, zell'fabrikoil, meblin edheotandoil i juvelirižil töil. «Google»-kompanijan braziline päfater om saudud lidnha.

Geografijan andmused

Lidn sijadase štatan keskuzpalan suves, 852 m ü.m.t. keskmäižel korktusel. Matkad Brazilia-pälidnhasai om 590 km lodeheze avtotedme, Atlantižen valdmeren randhasai om läz 500 km suvipäivnouzmha i suvhe.

Klimat om tropižen savannan kaks'sezonine, päivoikaz kuivan sezonan aigan. Voden keskmäine päiväline lämuz om +22,1 C°, kuidme +19,4..+24 C°. Ekstremumad oma +3,1 C° (kezaku) i +38,4 C° (reduku). Paneb sadegid 1578 mm vodes, enamba tal'vkus-vilukus (331..339 mm kus), vähemba kezakus-elokus (27 mm pordos). Kun keskmäine relätivine nepsuz vajehtase 54..60 % heinkus-redukus, 66..71 % kül'mkus-sulakus.

Tobmuz

Lidnan ühesa regionad i niiden ümbrikod (2018)

Belu Orizonti jagase ühesaks administrativižeks regionaks. Ned alajagasoiš läz 160 ümbrikoks (port.: barrio) vspäi 2002.

Edeline lidnan pämez' (port.: Prefeito de Belo Horizonte) om Alešandre Kalil (Alexandre Kalil, viluku 2017 — keväz'ku 2022).

Eläjad

Vn 2010 Brazilijan rahvahanlugemižen mödhe lidnan eläjiden lugu oli 2 375 444 ristitud. Kaikiš suremb ristitišt oli 2 501 576 eläjad vl 2018. Kaik kuz' millionad eläjid om lidnaglomeracijas (2022, metropolitenine region 9 459,1 km² pindanke, oli 5,3 mln vl 2018, koumanz' surtte valdkundas).

Augotižlibundan mödhe (2022): evropalaižed — 43,6 %, segoitadud augotižlibundanke (pardu) — 42,6 %, afrikalaižed — 13,5 %, azijalaižed — 0,2 %, indejalaižed — 0,1 %.

Lidn om štatan üläopendusen keskuseks. Znamasine aluzkund om Minas Žeraisan federaline universitet (port.: Universidade Federal de Minas Gerais, 45 tuh. üläopenikoid vl 2010), sen aluz om pandud vl 1927 nellän üläškolan ühtištusel, federaline status om anttud vl 1949.

Transport

Avtobusad oma kundaližeks transportaks lidnas BHTRANS-kompanijan ohjandusen al. Metropoliten radab vspäi 1986 (üks'jäine jono, 19 stancijad, 28,1 km raudted).

Rahvahidenkeskeine civiline Belu Orizonti-lendimport (vai Konfins — Tankredu Nevis, CNF / SBCF, 10,5 mln passažiroid vl 2023) sijadase 30 kilometras pohjoižhe lidnan keskuzpalaspäi. Tehtas reisid Latinižen Amerikan erasihe-se pälidnoihe i Lissabonha, Brazilijan äjihe lidnoihe.

Irdkosketused

• Lidnan municipalitetan oficialine sait (prefeitura.pbh.gov.br). (port.) (angl.) (isp.)