Šeksn (Šeksnan rajon)
Šeksn (ven.: Шексна) om Venäman lidnanvuitte žilo Vologdan agjan suves. Se om Šeksnan rajonan administrativine keskuz da kaikiš suremb eländpunkt, mugažo Šeksnan lidnankundan üks'jäine eländpunkt.
Lidnanznam
|
Flag
|
| Valdkund | Venäma |
| Eläjiden lugu (2016) | 18,881 ristitud |
| |
| Pämez' | Anatolii Prokopjev (2016—) |
| Telefonkod | +7−81 751-xx-xxx |
| Avtokod | 35 |
| Aigvö | UTC+3 (MSK+0) |
Šeksn om agjan videnz' surtte eländpunkt, seižub raudten, avtoten (A114) da veziten läbitusen sijas.
Istorii vajehta
Eländpunkt mainitase ezmäižen kerdan 16. voz'sadan aigkirjoiš kuti Nikol'skoje-külä. Vl 1954 se sai lidnanvuiččen žilon statusad i nimitihe sidä nügüdläižikš. Vspäi 1965 žilo tegihe uden rajonan administrativižeks keskuseks.
2000-nzil vozil zavottihe täutta industriališt Šeksn-zonad päivlaskmha žilospäi.
Šeksnan lidnankund om sätud vl 2005 elokun 18. päiväl.
Geografijan andmused vajehta
Žilo sijadase rajonan keskuses, pidust' Volgan-Baltijanmeren vezited, ühtennimižen jogen hural randal da sen huran Ugl-ližajogen oiktal randpolel, mugažo Šeksnan vezivaradimen hural randal. Matkad Vologdan keskushesai om 79 kilometrad päivnouzmha orhal, 86 km avtotedme. Lähembaine lidn om Čerepovec, 34 kilometrad päivlaskmha orhal, 54 km avtotedme.
Klimat om ven. Voden keskmäine lämuz om +2,6°C.
Šeksnan eländfartalad jagasoiš kahteks tarhaks: Šeksn-keskuz (Šeksn-1) da Šeksn-pohjoine (Šeksn-2). Avtotesild, Tön-ird (ven. улица Труда) da Šossejine-ird (улица Шоссейная) ühtenzoittas niid[1].
Tobmuz vajehta
Lidnankundan päkäskuz om vahvištadud vl 2005[2], se om väges nügüd' äiluguižidenke vajehtusidenke.
Kaik om viž valičendtarhad lidnankundas. 15 ezitajad mülüdas Lidnankundan Nevondkundha (ven. Совет поселения). Valitihe heid järgenduseližen kerdan vl 2013 sügüz'kun 8. päiväl[3]. Heiden valdatusiden strok om viž vot. Anatolii Prokopjev radab sen ezimehen — lidnankundan pämehen vn 2016 kezakun 28. päivän valičendoiden jäl'ghe Lidnankundan Nevondkundas sen ezitajišpäi, tegeškanzi radnikuzvelgusiden mödhe sil-žo vodel heinkun 4. päiväl. Varapämez' om hänele abhu.
Lidnankundan administracijan südäin om väges vn 2016 sügüz'kuspäi: administracijan pämez', varapämez', nell' palakundad, kaik om 16 radnikad[4].
Eläjad vajehta
Vn 2002 Venäman rahvahanlugemižen mödhe eläjiden lugu oli 21 615 ristitud, vl 2010 — 16 890 ristitud. Kaikiš suremb ristitišt oli vl 2009 — 21 744 eläjad. Rajonan ristitišton koume videndest eläb žilos.
Vspäi 1804 ortodoksižen hristanuskondan üks' jumalanpert' om žilos, se om Jumalanmaman Kazanin jumalaižen pühäpert', enččel — Nikolai-čudonsädajan pühäpert' Ustje-Ugol'skojes. Sen udessündutamine vedase vspäi 2013.
Ižanduz da transport vajehta
Ižandusen sarakod oma:
- pumaterialan süvä ümbriradmine;
- pusauvondmaterialiden pästand (komplektad pertid sauvomha);
- metalltorviden erazvuiččen profilän pästand;
- sömtegimišt;
- gidroenergetik (Šeksnan GES);
- gazanveimtransport (Gazprom Transgaz Uhta-edheotandan KS-21).
«Vologd — Uz' Ladog»-avtote (A114-trass) läbitab žilod, jagab sidä kaks'haz. Raudtestancii da jogiport ratas žilos.
Žilon i rajonan istorijan keskuz, sädamižen lapsidenkeskuz, sportškol i keskuzkirjištsistem oma žilos. Opendusen aluzkundad oma kaks' keskškolad i professionaline škol specialiženke augotižopendusenke.
Galerei vajehta
-
Toižen mail'man sodan muštnik. Šeksn-2 om tagamal -
Jumalanmaman Kazanin jumalaižen pühäpert' (2015) -
Ustje-Ugol'skojen škol (Šeksn-1) om üks' kahtes keskškolaspäi žilos -
Raudtestancijan sauvuz vl 2010
_-_panoramio.jpg)
Homaičendad vajehta
- ↑ Генеральный план городского поселения посёлок Шексна («Šeksn-žilo»-lidnankundan generaline plan). — Šeksnan lidnankundan oficialine sait (adm-sheksna.ru). (ven.)
- ↑ Устав городского поселения посёлок Шексна («Šeksn-žilo»-lidnankundan päkäskuz). — Šeksnan lidnankundan oficialine sait (adm-sheksna.ru). (ven.)
- ↑ Выборы депутатов Совета городского поселения посёлок Шексна Шекснинского муниципального района (Šeksnan lidnankundan Nevondkundan ezitajiden valičendad, Šeksnan municipaline rajon). — Tedod mänijoiš valičendoiš da referendumiš (vybory.izbirkom.ru) // Venälaižen Federacijan keskuzline valičemižlaudkund. (ven.)
- ↑ Структура администрации городского поселения посёлок Шексна («Šeksn-žilo»-lidnankundan administracijan südäin). — Šeksnan lidnankundan oficialine sait (adm-sheksna.ru). (ven.)
Irdkosketused vajehta
| Šeksn (Šeksnan rajon) Vikiaitas |