Takuarembo
Takuarembo (isp.: Tacuarembó [ta.kwa.ɾemˈbo], «rogojogi» guaranin kelespäi) om lidn Urugvain pohjoižes. Se om valdkundan kahesanz' lidn eläjiden lugun mödhe, Takuarembon agjan administrativine keskuz (vspäi 1837).
Lidnanznam
| |
| Valdkund | Urugvai |
| Eläjiden lugu (2011) | 54,755 ristitud |
| |
| Telefonkod | +598−463-xx-xxx |
| Aigvö | UTC−3 |
Istorii vajehta
Eländpunktan aluz om pandud vl 1832 San Fruktuoso-nimitusenke katoližen ph. Fruktuoz Tarragonalaižen nimen mödhe, Urugvain Fruktuoso Rivera-prezidentan kaičijan, hän käski säta eländpunktad. Žilo sai lidnuden statusad (isp.: villa) vl 1895, kätihe lidnaks (isp. ciudad) vn 1912 24. päiväl kezakud nügüdläiženke nimenke jogen mödhe.
Takuarembo om maižanduzrajonan keskuseks (živatvodind), sömtegimišton (lihakombinat, jauhtegimed) i mecpilindan edheotandad ratas lidnas.
Geografijan andmused vajehta
Lidn sijadase agjan pohjoižes, Takuarembo-jogen (260 km pitte, Rio Negron oiged ližajogi) Arrojo Takuarembo Čiko-ližajogen randal (Arroyo Tacuarembó Chico), 137 m ü.m.t. keskmäižel korktusel. Matkad Montevideo-pälidnhasai om 390 km suvhe avtotedme vai raudtedme.
Klimat om subtropine neps, keza om päivoikaz. Voden keskmäine lämuz om +18,3 C°, tal'vkun-keväz'kun +22,3..+24,5 C°, kezakun-elokun +12,2..+13,8 C°. Sumeged oma paksud tal'vaigan, voib panda halad harvoin lujas. Paneb sadegid 1427 mm vodes, läz tazomäras kuidme, enamba uhokus-sulakus (138..159 mm kus) i redukus (133 mm), vähemba heinkus-elokus (75..79 mm kus). Kun keskmäine relätivine nepsuz vajehtase 66..72 % röunoiš sügüz'kus-keväz'kus, 73..79 % sulakus-elokus.
Eläjad vajehta
Vl 1996 lidnan ristitišt oli 45 891 eläjad, vl 2004 — 51 224 eläjad. Vn 2011 Urugvain rahvahanlugemižen mödhe lidnan eläjiden lugu oli 54 755 ristitud, se oli kaikiš suremb ristitišt, agjan koume videndest.
Riman katoližen nell' pühäpertid oma avaitud lidnas. Ph. Fruktuozan päjumalanpertin originalan aluz oli pandud vl 1834, nügüdläine sauvuz om pühästadud vl 1917. Tulendoiden koume jumalanpertid oma Pühän Ristan, ph. Josifan, Lurdesan Jumalanmaman.
Galerei vajehta
-
Municipalitetan sauvuz i ph. Fruktuozan päjumalanpert' torgul 19. Sulakud (2005 vai sen aigemba) -
Municipaližen zooparkan kart (2009) -
Instituto de Formación Docente de Tacuarembó-aluzkund (2007) -
Lidnan avtobusstancii vl 2017 -
Takuarembo-lidnan raudtestancii vl 2005 vai sen aigemba
Irdkosketused vajehta
| Takuarembo Vikiaitas |