Neglik

Neglik
Järgeline neglik
Tedoklassifikacii
Valdkund: Živatad Tip: Sel'gjäntkeižed (Chordata) Klass: Imetaiživatad (Mammalia) Heimkund: Gavedinsöjad (Eulipotyphla) Sugukund: Neglikaižed (Erinaceidae) Heim: Evrazijalaižed neglikod (Erinaceus) Erik: Neglik
Latinankel'ne nimi
Erinaceus europaeus (Linnaeus, 1758)
Areal
Sistematik Vikierikoiš Kuvad Vikiaitas ITIS 633540 NCBI 9365

Neglik (latin.: Erinaceus europaeus) vai Järgeline neglik, om mecživat Neglikaižed-sugukundaspäi.

Leviganduz

Živat om levitadud Evropan meczonas: Päivlaskmaižen i Keskuzevropan levedlehtesižed mecad (sidä kesken Britanižed sared i Skandinavijan suvi), Venäman evropižen palan pohjoine i keskuzpala. Om Sibirin i Uden Zelandijan invazivižeks erikoks.

Ümbrikirjutand

Täuz'kaznu hibj oleleb 20..30 sm pitte i 700..800 grammad vedutte, händan piduz om läz koumed santimetrad. Pä om surehk tilgunvuitte, kärz om pit'kahk. Korvad oma penemb mi koume polenke santimetrad (päiči Kipran eričuiš). Neglikon nena om nügu i neps kaikenaigašti. Ülälouglus om 20 henod teravad hambast, alalouglus niid om 16.

Tagalopused oma pidemb mi ezilopused. Käbälod oma vižsor'mižed, sor'med oma teravidenke künzidenke. Järgeližen neglikon neglad oma lühüdamb mi koume santimetrad.

Ižačud kaitas territorijad i oma agressivižed toine toižennoks. Neglik lankteb tal'vunehe, sen aigan hibjan lämuz lankteb +1,8 Cel'sijan gradushasai i hän tegeb vaiše üht hengahtust minutas.

Mel'hetartuine fakt

• Om levedali tetab mel'pideg, miše neglikod pukstas ičeze negloihe sömäd (ozutesikš — jablokoid). Nece om petustuz, hot' erašti ned todas-ki ičeze pezaha negloiš lehtesid.