Konseps'jon

Konseps'jon (isp.: Concepción [kon.sepˈsjon]) om lidn Čilin keskuzpalas. Se om Biobion agjan administrativine keskuz.

Konseps'jon
Concepción

Lidnanznam	Flag
Valdkund	Čili
Eläjiden lugu (2017)	223,574 ristitud
Pind	221,6 km²
Pämez'	Al'varo Ortiz (tal'vku 2012—)
Telefonkod	+56−41
Aigvö	tal'vel UTC−4, kezal UTC−3

Lidnan kart ezilidnoidenke (2015)

Istorii

Eländpunktan aluz om pandud ispanijalaižel Pedro de Valdivia-konkistadoral vn 1550 redukus, hän-žo radoi Čilin ezmäižel gubernatoral. Konseps'jon om sirtud udhe nügüdläižhe sijha vl 1765 lujiden cunamiden tagut. Vl 1818 tedotihe Čili-valdkundan ripmatomudes neciš lidnas. Penko-lidn om olmas vanhal sijal vspäi 1842, pohjoižpäivnouzmaine ezilidn.

Konseps'jon šingotase aglomeracijan torguindan da opendusen keskuseks.

Geografijan andmused

Lidn sijadase Biobio-jogen estuarijan oiktal randal, Andiden ezimägištol, 12 m ü.m.t. keskmäižel korktusel. Matkad Santjagohosai om 464 km pohjoižpäivnouzmha, voib ajada sihe raudtedme vai avtotedme. Tal'kauano-lidn om Konseps'jonan avanportaks Tünen valdmeren randal, sijadase 13 km lodeheze. Lujad manrehkaidused oliba vozil 1960 (magnitud 7,4..8,2, mureni pertišton koumandest) i 2010 (8,8 magnitudanke).

Valdmerine vilu Gumbol'dtan joksmuz pehmitab säd, ei olele räkad vai halad. Klimat om ven kaks'sezonine. Heinkun lämuz om +9,2 C°, vilukun — +16,9 C°. Voden keskmäine lämuz om +12,9 C°. Paneb sadegid 1130 mm vodes. Kuiv sezon om tal'vkus-keväz'kus (15..25 mm kus), vihmsezon om semendkus-elokus (150..250 mm kus).

Geografižed koordinatad: 36° 46' 22" S 73° 03' 47" W.

Eläjad

Vl 2002 eläjiden lugu oli 216 061 ristitud, agjan ühesandez. Kaikiš suremb ristitišt oli 231 268 eläjad vl 2015. Konseps'jon om kahtenden surtte Čilin lidnaglomeracijan keskuz, siš om 945 tuhad eläjid (2012).

Galerei

• 
  Universitetan «Arco de Medicina»-bembelüläh
• 
  Üläkorged Andes-pert'
• 
  Biobio-jogen estuarijan nägu
• 
  Enzne kafedraline päjumalanpert', oli olmas vn 1939 manrehkaidushesai
• 
  «BioBus»-maršrutavtobus päraudtestancijhasai
• 
  El' Araukano-adivpert'
• 
  Pätorg vai Paradtorg (isp. Plaza de Armas)
• 
  Diplodok Juran pordon puištos Acevedon torgul

Irdkosketused

• Lidnan da kommunan tobmuden oficialine sait (concepcion.cl). (isp.)

Edesine lugemine

• Ida Stevenson Weldon Vernon (1969) Pedro de Valdivia, Conquistador of Chile, Greenwood Press.