Jonjin

Jonjin (kor.: 용인시 [joŋ.in]) om lidn Korejan Tazovaldkundan lodehes, Köngido-agjas. Se om populärine lebutaho, sijadase 40 km suvhe-suvipäivnouzmha Seulaspäi mägitahondas.

Jonjin
용인시 / 龍仁

Valdkund	Korejan Tazovaldkund
Eläjiden lugu (2020)	1,089,087 ristitud
Pind	591,32 km²
Telefonkod	+82−31
Aigvö	UTC+9

Istorii

Eländpunkt mainitase ezmäižen kerdan vl 475. Se sai oficiališt lidnan statusad vl 1996.

Jonjin šingotase programholitusen sarakol, üläopendusen keskuseks, turizmal: muzejad, änikoiden i rahvahankul'turan festivalid, severz'-se järvid kalanikoiden täht, vezipuišt, järed Everland-bobuštuzpuišt. 1970-nziden voziden jäl'ghe sirtihe lidnha neniden sarakoiden tegimid: himine, elektronine, tekstiline, mašinansauvomine, sömtegimišt. Vspäi 2012 tegimištgazoiden tegim om saudud.

Geografijan andmused

Lidn sijadase agjan suvipalas, mägitahondas. Röunatab Suvon-lidnanke päivlaskmhas.

Klimat om ven. Voden keskmäine lämuz om +11,6 C°, kezakun-elokun +22..+25 C°, tal'vkun-uhokun −1..−3 C°. Paneb sadegid 1291 mm vodes, enamba heinkus-elokus (290..374 mm kus), vähemba tal'vkus-vilukus (17..21 mm kus).

Jonjin jagase koumeks rajonaks (ku): Sudžigu, Kihingu, Čhojingu.

Eläjad

Vl 2011 eläjiden lugu oli 909 425 ristitud. Ületi millionad vl 2017. Kaikiš suremb ristitišt om nügüd'. Vl 1980 lidnan territorijan ristitišt oli 135 537 eläjad, sid' zavodihe sirta tegimid Jonjinha Seulan megapolisan decentralizacijan ramuziš.

Sijaližed üläopendusen aluzkundad oma Kannam-universitet, Policijan akademii, privatine Jonjinan universitet (alusenpanend 1953 kut dzüdon škol, universitet vspäi 1993, 15 tuh. üläopenikoid), mugažo severz'-se Seulan universitetoiden filialoid ratas.

Lidn om ühtenzoittud Seulanke metropolitenan jonol.

Irdkosketused

• Lidnan tobmuden sait (yongin.go.kr). (kor.)