Vasthein

Vasthein
Hahkalaz vasthein (Calamagrostis canescens) änikoičendan aigan, heimon tipine erik
Tedoklassifikacii
Valdkund: Kazmused Palakund: Änikkazmused (Magnoliophyta) Klass: Üksidülehtesižed (Monocotyledoneae) Kund: Tähkänikoižed (Poales) Sugukund: Tähkheinäd (Poaceae) Heim: Vasthein
Latinankel'ne nimi
Calamagróstis Adans., 1763
Sistematik Vikierikoiš Kuvad Vikiaitas ITIS 40529 NCBI 15376

Vasthein (latin.: Calamagrostis) om äivoččiden heinäsižiden kazmusiden heim. Mülütadas Tähkheiniden sugukundha.

Latinine nimituz mainitase Amuižen Grekanman Dioskorid-sodalekaril. Se om saudud kahtes sanaspäi grekan augotižlibundanke: kalamos «rogo» i agrostis «kastehein», ozutab niiden pojavut.

Leviganduz

Heimon erikod oma levitadud vilus i venos vöiš. Kazdas tropikoiden mägiden pautkil mugažo, molembiš mapoliškoiš.

Nened tahod oleldas erazvuiččiden erikoiden eländtahoikš: sokaz tahond turbazmahusenke, mec, penzhišt, pilitišed, luhtad, jogiden randad.

Ümbrikirjutand

Erikod oma pojavad keskneze morfologižikš, no kaikutte navedib kazda erinijas eländtahos.

Heinäd löustkekahidenke vai erasti tähkanvuiččidenke änikusidenke, tähkuden änik om üks'jäine. Šingotase kezan ezmäižes poles. Tähkuden värtmuz om karvakaz, sen tagut änikuz näguse pehmdaks küpsmižen aigan.

Kävutand

Läz kaikiden erikoiden kaidad lehtesed i seikhed oma kauktad, ka ottas hondladuižeks sötmižkazmuseks vaiše severzid-se erikoid Arktikan i mägiomaluižiden arvoimižiš. Kuivmavasthein (Calamagrostis epigejos) i Psevdorogonvuitte vasthein (Calamagrostis pseudophragmites) sätas žomid i varmdad turbišt, kävutasoiš varmitamha letkesižid pautkid. Voib löuta dekorativižid erikoid.

Valitud erikod

Kaik lugetas läz 260 erikod heimos, sidä kesken 50 erikod kazdas Venäman territorijal.

• Calamagrostis arundinacea — Rogonvuitte vasthein
• Calamagrostis canescens — Hahkalaz vasthein, heimon tipine erik
• Calamagrostis epigejos — Kuivmavasthein
• Calamagrostis lanceolata — Lancetanvuitte vasthein
• Calamagrostis neglecta — Homaičematoi vasthein
• Calamagrostis pseudophragmites — Psevdorogonvuitte vasthein
• Calamagrostis purpureus — Purpurine vasthein