Sarapul

Sarapul (udm.: Сарапул / Сарапул кар, ven.: Сара́пул) om Venäman lidn Udmurtijan Tazovaldkundan suvipäivnouzmas. Se om tazovaldkundan koumanz' lidn eläjiden lugun mödhe, municipaližen «Sarapul-lidn»-ühtnikan üks'jäine eländpunkt.

Sarapul
Сарапул (ven. i udm.)

Lidnanznam	Flag
Valdkund	Venäma
Eläjiden lugu (2021)	94,554 ristitud
Pind	88 km²
Pämez'	Viktor Šestakov (kül'mku 2020—)
Telefonkod	+7−34 147-xx-xxx
Avtokod	18
Aigvö	UTC+4 (MSK+1)

Istorii

Külä nügüdläiženke nimenke mainitase ezmäižen kerdan 13. voz'sadal. Mugažo oli tetab kuti Voznesenskoje-külä. Sarapul sai lidnan statusad vl 1780. Ende oli torgovanoiden lidnaks.

Sarapul šingotase elektrotehnikan, mecanümbriradmižen (pilindmaterialad, meblinlaud i mebel', pordhad, parket), sömtegimišton (likörtegim) da kebnan tegimišton (kengäd, nahkan tehmine) edheotandoil. Lidn om maižanduzrajonan keskuz.

Geografijan andmused

Kam-jogen randird lidnan keskuzpalas (2019)

Lidn sijadase Kamanjogen oiktal korktal randal, 80 m ü.m.t. keskmäižel korktusel. Sarapulan rajon ümbärdab lidnad, Kambarkan rajon zavodiše ani suvipäivnouzmha. Matkad Iževskhasai om 62 km lodeheze. Lähembaine lidn om Kambark 30 km suvipäivnouzmha.

Klimat om ven kontinentaline. Voden keskmäine lämuz om +3,9 C°, kezakun-uhokun +17..+20 C°, tal'vkun-uhokun −10..−12 C°. Ekstremumad oma −39 C° i +38 C°. Paneb sadegid 575 mm vodes, enamba kezakus-elokus (60..70 mm kus), vähemba uhokus-sulakus (29..31 mm kus).

Tobmuz

Kaik om sätud 22 territoriališt nimitadud lidnanlaptad lidnas.

Edeline lidnümbrikon pämez' om Aleksandr Jessen (sügüz'ku 2015 — sügüz'ku 2020, Александр Ессен).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 101 381 ristitud. Kaik 97 910 eläjad oli lidnas vl 2017. Kaikiš suremb lidnan ristitišt oli läz 110 tuh. eläjid vozil 1987−1994.

Ortodoksižen hristanuskondan 14 pühäpertid oma kaičenus i saudud lidnas: kahesa jumalanpertid, nell' loičendpertid i kaks' časounäd. Islaman kaks' pühäpertid oma avaitud: Keskuzline mečet' (om saudud vl 1994) i Elekond-mikrorajonan «mahallä» (kundaline) mečet'.

Galerei

• 
  Lidnan administracijan sauvuz (Rusked torg, 2018)
• 
  Sarapul-lidnan käskuzkund (Rusked torg, 2013)
• 
  Jumalanmaman Katken kafedraline päjumalanpert', vn 2012 nägu
• 
  Sarapulan elektrogeneratorine tegim vl 2012
• 
  Sarapulan radiotegimen pätulend vl 2007
• 
  Kodirandantedištandmuzei (2013)
• 
  Bašeninan kezapert' (1911)
• 
  «Opera house»-kul'turižbobuštuzkeskuz (2015)
• 
  Sur' Sarapulk-jogen (udm.: Бадӟым Сарапул) ümbärdai kanal vl 2015
• 
  Sarapul-päraudtestancii vl 2013

Irdkosketused

• Municipaližen «Sarapul-lidn»-ühtnikan tobmuden aluzkundoiden sait (adm-sarapul.ru). (ven.)