Roslavl'

Roslavl' (ven.: Ро́славль) om Venäman lidn, lidnankund da transporttesol'm Smolenskan agjan suves. Se om agjan koumanz' lidn eläjiden lugun mödhe, Roslavlin rajonan administrativine keskuz.

Roslavl'
Рославль

Lidnanznam	Flag
Valdkund	Venäma
Eläjiden lugu (2021)	45,416 ristitud
Pind	41,5 km²
Pämez'	Lübov' Gavrilük (reduku 2021—)
Telefonkod	+7−48 134-xx-xxx
Avtokod	67
Aigvö	UTC+3 (MSK+0)

Istorii

Eländpunkt mainitaškanzihe vspäi 1137 Rostislavl'-nimitusenke, sen aluz om pandud Rostislav Mstislavič-ruhtinasel kuti hänen ruhtinazkundan keskuz. Vll 1358−1522 mülüi Sur'he Litvanman ruhtinazkundha, 17. voz'sadan ezmäižes palas — Reč Pospolitai-valdkundha, sai Magdeburgan oiktusid vl 1623. Anttihe lidnan oficiališt statusad vl 1755 nügüdläiženke nimitusenke. Toižen mail'man sodan aigan lidn oli okkupiruidud nacistoil (3. eloku 1941 — 25. sügüz'ku 1943).

Roslavl' šingotase mašinansauvomižel (vagonoiden kohenduz da tehmine, diamantinstrument, avtoazotimed i poltuzpompad, sodatehnikan kohenduz), sauvondmaterialiden pästandal (meckombinat, sauvondmujud), tekstil'edheotandoil (omblendfabrik, trikotegesed, lapsidenbobaižed), stökolpakuitesen tegimel, sömtegimištol (razvankombinat, maploduiden kuivateztegim, leibänkombinat, lihaprodukcijan edheotand). Lidn om maižanduzrajonan keskuz maploduiden kazvatandanke.

Geografijan andmused

Lidn sijadase rajonan päivlaskmas, Ostör-jogen hural randal (ven.: Остёр 274 km pitte, Dnepran hurapol'ne bassein), 200 m ü.m.t. keskmäižel korktusel. Stanovk-jogi (ven. Становка, piduz 15 km) jokseb lidnadme da lankteb Ostörha ani lidnan pohjoižpäivnouzmaižen röunan taga. Matkad Smolenskhasai om 108 km lodeheze-pohjoižhe orhal, 112 km avtotel vai raudtel. Lähembaine lidn om Desnogorsk 36 km pohjoižpäivnouzmha orhal vai 40 km avtotedme. «Smolensk — Bränsk»-avtote i raudte läbitadas lidnad. Avtoümbärte om saudud suvhe, päivlaskmaižhe i pohjoižhe lidnaspäi. Roslavl' I-raudtestancii radab lidnan pohjoižpäivnouzmas vspäi 1868.

Roslavl' om lidnankundan üks'jäižeks eländpunktaks. Se jagase 11 territorialižeks nimitadud mikrorajonaks. Lidnankundan pind — 41,5 km².

Eläjad

Vl 1939 lidnan ristitišt oli 41 480 eläjad. Vn 2010 Venäman rahvahanlugemižen mödhe lidnan eläjiden lugu oli 53 700 ristitud, rajonan viž seičemendest. Kaik 50 870 eläjad oli lidnas vl 2017. Kaikiš suremb lidnan ristitišt oli 60..61 tuhad eläjid vll 1986−1998 (61 100 rist. vl 1996).

Rahvahad (2002): venälaižed — 95,3 %, vaugedvenälaižed — 1,6 %, toižed rahvahad — 3,1 %.

Ortodoksižen hristanuskondan kümne pühäpertid oma kaičenus i saudud lidnas: Spasan Toižetamižen jumalankodi päjumalanpertinke, jumalanpertinke i časounänke, seičeme jumalanpertid. Niiden ližaks Jumalanmaman Blagoveššenjan päjumalanpert' i Pühän Hengen Tulendan jumalanpert' ei ole kaičenus.

Professionaližen opendusen aluzkundad oma Roslavlin äiprofil'ne kolledž, medicinine tehnikum, üläopendusen aluzkundoiden koume filialad. Raudtentehnikum radoi edel vn 2022 sügüz'kud.

Lidnankundan pämez' om sen nevondkundan ezimez'. Edeline lidnan pämez' om Marina Stupina (reduku 2016 — reduku 2021).

Galerei

• 
  Bajarišton suiman pert' (2014)
• 
  Spasan Toižetamižen jumalankodi, vn 2009 nägu
• 
  Diamantinstrumentan tegim vl 2014, naižgimnazii enččes
• 
  Roslavlin kul'turkeskuz (2009)
• 
  Lidnan päraudtestancii vl 2018

Irdkosketused

• Lidnan da rajonan tobmuden aluzkundoiden sait (roslavl.ru). (ven.)