Rodniki (lidn)

Rodniki (ven.: Родники́) om Venäman lidn da lidnankund Ivanovon agjan keskuzpalan pohjoižpäivnouzmas. Se om Rodnikin rajonan administrativine keskuz (vspäi 1924).

Rodniki
Родники

Valdkund	Venäma
Eläjiden lugu (2021)	23,895 ristitud
Pind	17,7 km²
Pämez'	Andrei Morozov (kül'mku 2005—)
Telefonkod	+7−49 336-xx-xxx
Avtokod	37
Aigvö	UTC+3 (MSK+0)

Istorii

Eländpunkt mainitase ezmäižen kerdan Ivan Grazijan kirjeižes Suzdalin Jumalankatken naižjumalankodile vl 1564. Nimitihe tervehtoitajan purtken mödhe (ven.: родник). Vl 1820 Krasil'šikovad-torgovanoiden tekstiline edheotand radaškanzi žilos. Radnikžilo sai lidnan statusad vl 1918.

Rodniki-lidn šingotase bumagkanghiden pästandal, mašinansauvomižen tegimel (pnevmatine mašiništ kaivuztegimišton täht, edel 2008. vot produkcii oli avtobusad «ZIL»-šassil), leibän edheotandal, sauvondtegesil (uksenpeled).

Geografijan andmused

Lidn sijadase rajonan keskuzpalas, penen Jukš-jogen randal (ven.: Юкша, zavodiše lidnan uitos), 140 m ü.m.t. keskmäižel korktusel. Matkad Ivanovohosai om 47 km päivlaskmha-suvipäivlaskmha orhal vai 54 km avtotel. Toižed lähembaižed lidnad oma Vičug (raudtestancii) 17 km pohjoižpäivnouzmha orhal vai 21 km avtotedme, Šui 36 km suvipäivlaskmha-suvhe orhal vai 43 km avtotedme, i Furmanov 41 km päivlaskmha-lodezehe orhal vai 56 km avtotedme. «Ivanovo — Kinešm»-avtotekeskust om lidnan suvižeks i suvipäivnouzmaižeks röunaks. Raudten kahesakilometrine sarak ühtenzoitab lidnad «Ivanovo — Kinešm»-keskustanke, radab vaiše juguiden täht.

Rodniki om lidnankundan üks'jäine eländpunkt.

Eläjad

Vl 1939 lidnan ristitišt oli 26 996 eläjad. Vn 2010 Venäman rahvahanlugemižen mödhe lidnan eläjiden lugu oli 26 310 ristitud, rajonan seičeme kümnendest. Kaikiš suremb ristitišt oli 30..32 tuhad eläjid vozil 1967−1999 (32 300 rist. vl 1992).

Rahvahad (2010): venälaižed — 96,9%, toižed rahvahad — 3,1%. Ivanovon agjan kozakišton keskuz («stan») sijadase lidnas.

Ortodoksižen hristanuskondan kuz' pühäpertid oma olmas lidnas: koume jumalanpertid i koume časounäd.

Rodnikin politehnine kolledž om professionaližen opendusen aluzkundaks.

Galerei

• 
  Leninan torg (2018)
• 
  Krasil'šikovad-torgovanoiden istorine eländpert', vn 2018 nägu
• 
  Tekstilin edheotand vl 2018 (ezimal)
• 
  Kul'turkeskuz (2018)
• 
  Rodnikin politehnine kolledž vl 2019

Irdkosketused

• Lidnan da rajonan tobmuden sait (rodniki-37.ru). (ven.)
• Lidnan informacine portal (rodniki.ru). (ven.)