Pokrovsk (Saha Tazovaldkund)

Pokrovsk (ven.: Покровск, jakut.: Покровскай) om Venäman lidn da lidnankund Saha Tazovaldkundan keskuzpalas. Se om Hangalassin ulusan administrativine keskuz.

Pokrovsk
Покровск (ven.)
Покровскай (jakut.)

Lidnanznam	Flag
Valdkund	Venäma
Eläjiden lugu (2017)	9,177 ristitud
Pämez'	Petr Germogenov (sügüz'ku 2015—)
Telefonkod	+7−41 144-xx-xxx
Avtokod	14
Aigvö	UTC+9 (MSK+6)

Sil sanal voib olda toižid znamoičendoid; miše nähta niid, tulgat tänna.

Istorii

Enččel jakutalaižiden Tigin Darhan-karaulpost seižui korktal nemel. Nügüdläižen eländpunktan aluz om pandud vl 1682 kuti Jumalanmaman katken rist-karaulpost (ven.: Покровский крест — караульный пост). Vozil 1720−1734 da 1787−1960 jumalanpert' oli olmas, sidä kävutihe naižjumalankodikš. Pokrovsk sai lidnan statusad vl 1997.

Geografijan andmused

Lidn sijadase Len-jogen korktal hural randal, seižub 90 m keskmäižel korktusel valdmeren pindan päl. Matkad Jakutskhasai om 78 km pohjoižpäivnouzmha, se om lähembaine lidn.

Pokrovsk om lidnankundan üks'jäine eländpunkt. Lidnankundan pind — 320,81 nellikkilometrad.

Eläjad

Vn 2010 kaiken Venäman rahvahanlugemižen mödhe eläjiden lugu oli 9 495 ristitud, ulusan ristitišton kaks' seičemendest. Kaikiš suremb ristitišt oli enamba 10 tuhad eläjid vozil 2000−2009 (10 200 rist. vl 2001).

Ortodoksižen hristanuskondan Pühän Jumalanmaman Katken jumalanpert' om saudud lidnas vll 2006−2007, sen 325-voččele jubilejale. Jumalanmaman Katken vanh naižjumalankodi om avaitud sen alusel vspäi 2017.

Ižanduz da transport

Tegimišton sarakod oma sauvondmaterialiden tehmine, bazal'ttegesiden pästand, kombisömän tegim živatoiden täht. Maižandusen edheotand i karvanferm oma olmas lidnankundas. Biznes-tehnologijoiden kolledž om professionaližen opendusen aluzkundaks.

Avtobusad oma kundaližeks transportaks lidnas da sen ümbrištos. Asfal'tiruidud te ühtenzoitab Jakutskanke. «Tind — Alabestäh»-raudte i federaline «Len»-trass (A360) mändas Lenan vastrandadme, valdmad oma lidnas da «Pokrovsk — Tit-Ebä»-ehtatim Lenas üliči.

Irdkosketused

• Pokrovsk-lidnan tobmuden sait Saha (Jakutijan) Tazovaldkundan oficialižel portalal (pokrovsk.sakha.gov.ru) (ven.) (angl.) (jakut.) da sen vanh versii.