Pit' Jah (ven. i tot.: Пыть-Ях, ukr.: Пить-Ях) om Venäman lidn da lidnümbrik Hantin da Mansin avtonomižen ümbrikon keskuzpalan suvipäivnouzmas. Om ümbärtud Neftejuganskan rajonan territorijal.

Pit' Jah
Пыть-Ях
 Lidnanznam
 Flag
Valdkund Venäma
Eläjiden lugu (2021) 40,180 ristitud
Pind 80,4 km²
Pit' Jah Пыть-Ях
Pämez' Dmitrii Gorbunov
(kül'mku 2023—)
Telefonkod +7−3463-xxx-xxx
Avtokod 86, 186
Aigvö UTC+5 (MSK+2)

Istorii vajehta

Eländpunktan aluz om pandud vl 1968 kuti Mamontovo-žilo i Mamontovon burauduzkontor samha kivivoid, i vspäi 1970 jätktas samižen kahtendes surtte Samotloran jäl'ghe löudmižsijaspäi. Nimitihe Pit' Jah-žilod Pit'jah-jogen mödhe (ven.: Пытьях 50 km pitte, lankteb Surhe Balikha huralpäi), nimi znamoičeb «jogite» hantin kelespäi. Vn 1982 keväz'kus ühtištadihe Mamontovo-, Suvibalik- (ven.: Южный Балык) i Pit' Jah-žiloid, kätihe lidnanvuiččeks Pit' Jah-radnikžiloks. Vn 1990 6. päiväl elokud žilo sai lidnan statusad ümbrikon alištusenke.

Pit' Jah šingotase kivivoin samižel da pompandal («RN-Juganskneftegaz»-kompanii om «Rosneftin» palaks), sen gazan Suvibalikan ümbriradajal kompleksal, töhöpästandan edheotandal («RN-Avtomatika») i mecan ümbriradmižel, mugažo mebel'ceh radab.

Geografijan andmused vajehta

Lidn sijadase Sur' Balik-jogen oiktal randal (ven.: Большой Балык 243 km pitte, Obin hura ližajogi), 50 m ü.m.t. keskmäižel korktusel.

Matkad Hanti-Mansiiskhasai om 209 km päivlaskmha orhal vai 259 km avtotedme. Lähembaine lidn om Neftejugansk 39 km pohjoižhe orhal vai 49 km avtol. Pit' Jah-päraudtestancii (saudihe vll 1975−1978) om lähembaine Neftejuganskan eläjiden täht.

Tobmuz vajehta

Pit' Jah om lidnümbrikon üks'jäižeks eländpunktaks. Lidn jagase kümneks nomeruidud mikrorajonaks (1..10).

Lidnümbrikon tobmuden pämez' om sen Administracijan pämez'. Edeližed lidnan pämehed oma Aleksandr Morozov (kül'mku 2018 — kül'mku 2023), Oleg Kovalevskii (kül'mku 2016 — kül'mku 2018). Duman ezimez' om Dmitrii Ureki vn 2021 redukuspäi. Edeline ezimez' om Oleg Ševčenko (kül'mku 2016 — sulaku 2021).

Eläjad vajehta

Vn 2010 kaiken Venäman rahvahanlugemižen mödhe lidnan eläjiden lugu oli 41 488 ristitud. Kaik 40 798 eläjad oli lidnas vl 2017. Kaikiš suremb lidnan ristitišt oli 41..42 tuhad eläjid vll 1998−2015 (42 500 rist. vl 1998).

Rahvahad (enamba 0,8 % vl 2010): venälaižed — 55,8 %, ukrainalaižed — 9,3 %, totarlaižed — 7,4 %, kumikad — 5,0 %, baškiralaižed — 3,2 %, azerbaidžanlaižed — 2,7 %, čečenalaižed — 1,7 %, čuvašalaižed — 1,4 %, lezgilaižed — 1,3 %, moldovalaižed — 1,1 %, vaugedvenälaižed — 0,8 %, toižed rahvahad — 5,9 %, rahvahuden ozutandata — 4,4 %.

Ortodoksižen hristanuskondan Jumalanmaman «Varastamatoi ihastuz»-jumalaižen jumalanpert'[1] om saudud lidnas vll 1995−1999. Islaman pämečet' om letud vll 2012−2019.

Lapsiden opendusen aluzkundad oma viž päivkodid, progimnazii, keskškolan i päivkodin kompleks, viž keskškolad (nomer 1, 2, 4, 5, 6), čomamahtoiden škol (700 openikad), olimpižen rezervan sportškol. Pit' Jahan industrialine kolledž om lidnan professionaližen opendusen aluzkundaks, se om Jugran valdkundaližen universitetan filial.

Homaičendad vajehta

  1. Pit' Jahan pühäpertid sobory.ru-saital. (ven.)

Irdkosketused vajehta



Hantin da Mansin avtonomižen ümbrikon lidnad
Belojarskii | Hanti-Mansiisk | Jugorsk | Kogalim | Langepas | Läntor | Megion | Neftejugansk | Nižnevartovsk | Nägan' | Pit' Jah | Pokači | Radužnii | Sovetskii | Surgut | Urai