Kimri (ven.: Ки́мры) om Venäman lidn da lidnümbrik Tverin agjan suvipäivnouzmas. Se om agjan videnz' lidn eläjiden lugun mödhe, mugažo Kimrin rajonan administrativižeks keskuseks (ei mülü rajonha).

Kimri
Кимры
 Lidnanznam
 Flag
Valdkund Venäma
Eläjiden lugu (2020) 43,216 ristitud
Pind 44 km²
Kimri Кимры
Pämez' Andrei Lukjanov
(tal'vku 2022—)
Telefonkod +7−48 236-xx-xxx
Avtokod 69
Aigvö UTC+3 (MSK+0)

Istorii vajehta

Eländpunkt mainitase ezmäižen kerdan Ivan Grazijan kirjeižes vl 1546 kuti Kimr-žilo (ven.: село Кимра). Se šingotihe kengiden (sapkoiden) tehmižel, pästtihe severz'-se millionid paroid vodes. Vl 1859 luja lämoipalo pani puišt pertištod mantazole, udessaudihe kahtes vodes. Vspäi 1902 raudte ühtenzoitab lidnad Moskvanke, Savölovo-stancii sijadase Volgan oiktal randal, om nimitadud enččen lähižen külän mödhe.

Kimri sai lidnan statusad vn 1917 kezakus. Läz sadad kivišt i puist torgovaništon pertid om kaičenus lidnas.

Kimrin ižandusen päsarakod oma tömašintegimišt, sauvondmaterialiden tehmine (mecan ümbriradmine, bazal'tkuid), kebn tegimišt (koume keng'fabrikad i kaks' trikotažfabrikad), turizm.

Geografijan andmused vajehta

Lidn sijadase Volgan (Ugličun vezivaradim) molembil randoil i sen huran Kimark-ližajogen randoil (ven.: Кимрка (Кимарка), 32 km pitte), istorine keskuz — Volgan hural randal, 219 m ü.m.t. keskmäižel korktusel.

Matkad Tverihesai om 87 km päivlaskmha orhal vai 101 km avtotedme. Lähembaižed lidnad oma Taldom (Moskvan agj) 20 km suvipäivnouzmha i Dubn (Moskvan agj) kümnes kilometras suvipäivlaskmha vai Volgan ülezjogen. Avtotesild ühtenzoitab Volgan randoid vspäi 1978.

Tobmuz vajehta

Kimri om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez'. Edeline lidnan pämez' om Irina Balkovaja (uhoku 2020 — tal'vku 2022). Lidnümbrikon Duman ezimez' om Alla Aleksejeva vn 2022 redukuspäi. Edeline Duman ezimez' om Dmitrii Krivčikov (tal'vku 2019 — reduku 2022).

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 49 628 ristitud. Kaikiš suremb lidnan ristitišt oli 58..61 tuhad eläjid vll 1973−2001 (61 800 rist. vl 1992). Kaik 45 504 eläjad oli lidnas vl 2017.

Ortodoksižen hristanuskondan seičeme pühäpertid[1] oma kaičenus i saudud lidnas: Spasan Toižetamižen päjumalanpert' (1911), Sündun Voznesen'jan jumalanpert' (om letud 1813−1829), phh. Zaharijan i Jelisavetan jumalanpert' Savölovos, kodipühäpert', koume časounäd. Niiden ližaks kaks' päjumalanpertid i jumalanpert' oma pandud mantazole. Baptizman loičendpert' om avaitud.

Kimrin kolledž[2], Kimrin medicinine kolledž[3] i Savölovon kolledž[4] oma lidnan professionaližen opendusen aluzkundoikš.

Galerei vajehta

Homaičendad vajehta

  1. Kimrin pühäpertid sobory.ru-saital. (ven.)
  2. Kimrin kolledžan sait (kimtech69.ru). (ven.)
  3. Kimrin medkolledžan sait (kmk-69.ru). (ven.)
  4. Savölovon kolledžan sait (сккимры.рф). (ven.)

Irdkosketused vajehta



Tverin agjan lidnad
Andreapol' | Belii | Bežeck | Bologoje | Kaläzin | Kašin | Kimri | Konakovo | Krasnii Holm | Kuvšinovo | Lihoslavl' | Nelidovo | Ostaškov | Päivlaskmpol'ne Dvin | Ržev | Staric | Zubcov | Toropec | Toržok | Tver' | Udoml' | Ves'jegonsk | Višnii Voločok