Kamensk Uralal

Kamensk Uralal
Каменск-Уральский
Lidnanznam;	Flag;
Valdkund	Venäma
Eläjiden lugu (2021)	163,990 ristitud
Pind	144,08 km²
Pämez'	Aleksei Gerasimov; (viluku 2021—)
Telefonkod	+7−3439-xxx-xxx
Avtokod	66, 96, 196
Aigvö	UTC+5 (MSK+2)

Kamensk Uralal (ven.: Ка́менск-Ура́льский) om Venäman lidn da lidnümbrik Sverdlovskan agjas. Se om agjan koumanz' surtte i kaikiš suvemb lidn, lidnümbrikon nimi — Kamenskan Uralal lidnümbrik. Lidn om Kamenskan lidnümbrikon (edel 2006. vot — rajonan) administrativižeks keskuseks mugažo, om ümbärtud sil i ei mülü sihe.

Istorii vajehta

Eländpunktan aluz om pandud Dalmatovon jumalankodil vl 1682 kuti Železenskoje-žilo parččomas samha raudkivendod, mitte oli pindal. Vl 1701 valdkund oti mad tagaz i sauvoi Uralan ezmäšt kaugedraudan suladuztegint. Vll 1701−1935 nimitihe žiloks Kamenskii-tegimenno (ven.: Каменский Завод). Vl 1885 raudtesarak ühtenzoiti sidä Transsibanke. Vn 1935 20. päiväl sulakud anttihe žilole lidnan statusad Kamensk-nimitusenke. Vl 1940 udesnimitihe nügüdläižikš erištamha Kamensk Šahtil-lidnaspäi. Vspäi 1963 lidn alištub agjan tobmudele oikti.

Kamensk Uralal šingotase mujumetalloiden (alüminii, vas'k, litii, magnii da niiden ühthesuladused) i raudan metallurgijal (torved kivivoikompleksan täht), mašiništonsauvomižel, sauvondmaterialiden edheotandoil (savič, raudbetonapakod, mujud, puižed i metalližkonstrukcijad), sömtegimištol, mugažo kodihimijan i pakuitesen tegimed ratas.

Geografijan andmused vajehta

Lidn sijadase tazangištol, Iset'-jogen i sen huran Kamenk-ližajogen randoil (ven.: Каменка 57 km pitte, Tobol-jogen hurapol'ne bassein), 160 m ü.m.t. keskmäižel korktusel. «Jekaterinburg — Kurgan»-avtote (R354) ümbärdab lidnad suvespäi. Kamensk Uralal-päraudtestancii om saudud Isetin hural randpolel. Matkad Kurganan agjan röunhasai om 6 km suvipäivnouzmha, Čeläbinskan agjan röunhasai om 20 km suvipäivlaskmha, lidnan keskusespäi Jekaterinburgan keskushesai om 93 km lodeheze orhal, 100 km avtotedme vai raudtedme. Lähembaižed lidnad oma Kataisk (Kurganan agj) 43 km päivnouzmha orhal, avtotedme vai raudtel, Bogdanovič 40 km pohjoižhe orhal vai raudtel, 73 km avtol, i Zarečnii 58 km lodeheze orhal, 72 km avtol vai raudtel.

Kamensk Uralal jagase kahteks rajonaks, Iset'-jogi erigoitab niid: Sinarskii (hural randal) i Krasnogorskii (oiktal randal). Viž pen't küläd da üks' žilo mülüdas lidnümbrikho Kamenskan Uralal ližaks. Lidnümbrikon pind — 144,23 km².

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 174 689 ristitud, lidnümbrikon — 176 572 ristitud. Kaikiš suremb lidnan ristitišt oli 202..209 tuhad eläjid vll 1985−1994 (209 tuh. rist. vll 1991−1992). Kaik 168 997 ristitud elihe lidnas i 170 782 ristitud kaikes lidnümbrikos vl 2018.

Rahvahad (2010, ozutadud rahvahudenke): venälaižed — 92,6%, totarlaižed — 3,8%, toižed rahvahad — 3,6%.

Ortodoksižen hristanuskondan nened pühäpertid^[1] oma olmas: ph. Stroican kafedraline päjumalanpert' (kivine om saudud vll 1821−1828), nell' jumalanpertid, Sündun Toižetamižen mez'jumalankodi kahtenke jumalanpertinke i časoun'. Protestantizman «Udessündund»-pühäpert' i islaman «Ramadan»-mečet' oma avaitud lidnas.

Professionaližen keskopendusen ühesa aluzkundad i üläopendusen aluzkundoiden ühesa filialad ratas lidnas, mugažo alüminijan tegimišton tedoinstitut. Kaik om kaks' sportkompleksad, viž stadionad, jäaren, suks'-biatlonan i motokrossan trassad.

Edeline lidnan pämez' om Aleksei Šmikov (keväz'ku 2016 — viluku 2021, Алексей Шмыков).

Galerei vajehta

Lidnan administracijan sauvuz (2013)
Pühän Stroican kafedraline päjumalanpert', vn 2013 nägu
Pühän Jumalanmaman Katken jumalanpert', vn 2018 nägu
Uralan alüminijantegimen (UAZ) pätulend vl 2011
Tehmištol'ne «Oktäbr'»-ühtelmaz vl 2007 (radiotegim, Reduku)
«Petrovskii»-bizneskeskuz vl 2013
«Megamart»-torguindkeskuz vl 2012
«SinTZ»-sportkeskuz (2006)
Motokrossan kalutadud trass (2013)
Kamensk Uralal-päraudtestancii vl 2011

Homaičendad vajehta

↑ Kamenskan Uralal pühäpertid sobory.ru-saital. (ven.)

Irdkosketused vajehta

Kamensk Uralal Vikiaitas

	Sverdlovskan agjan lidnad
	Alapajevsk \| Alasald \| Alasergid \| Alatagil \| Alatur \| Aramil' \| Artömovskii \| Asbest \| Berözovskii \| Bogdanovič \| Degtärsk \| Irbit \| Ivdel' \| Jekaterinburg \| Kačkanar \| Kamensk Uralal \| Kamišlov \| Karpinsk \| Kirovgrad \| Krasnoturjinsk \| Krasnoufimsk \| Krasnoural'sk \| Kušv \| Lesnoi \| Mihailovsk \| Nevjansk \| Novoural'sk \| Pervoural'sk \| Polevskoi \| Rež \| Revd \| Serov \| Severoural'sk \| Sisert' \| Sredneural'sk \| Suhoi Log \| Zarečnii \| Talic \| Tavd \| Turinsk \| Uz' Läl' \| Verhoturje \| Volčansk \| Üläpišm \| Üläsald \| Ülätagil \| Ülätur

[1] Kamenskan Uralal pühäpertid sobory.ru-saital. (ven.)

[1]

Lidnanznam	Flag
Valdkund	Venäma
Eläjiden lugu (2021)	163,990 ristitud
Pind	144,08 km²

Pämez'	Aleksei Gerasimov (viluku 2021—)
Telefonkod	+7−3439-xxx-xxx
Avtokod	66, 96, 196
Aigvö	UTC+5 (MSK+2)