Kadui
Kadui (ven.: Ка́дуй) om Venäman lidnanvuitte žilo Vologdan agjan suvipäivlaskmas. Se om Kadujan ümbrikon administrativine keskuz da kaikiš suremb eländpunkt.
| Valdkund | Venäma |
| Eläjiden lugu (2023) | 11,373 ristitud |
| Pind | 44 km² |
| |
| Telefonkod | +7−81 742-xx-xxx |
| Avtokod | 35 |
| Aigvö | UTC+3 (MSK+0) |
Istorii vajehta
Eländpunktan aluz om pandud vl 1904 kuti Kadui-raudtestancii «Piter — Vologd»-keskustal. Sil vodel saudihe raudtestancijan pertid. Jonused ajaškanziba vspäi 1906. Stancii om nimitadud Kadui-külän mödhe, kudamb sijadase seičemes kilometras pohjoižpäivnouzmha. Sauvomižen aigan sirtihe raudted projektan rindataden ümbärdamha Andog-jogi, no nimitihe stancijad projektan mödhe. Vl 1927 Kadui-stancii kändihe ühtennimižen rajonan administrativižeks keskuseks. Vn 1947 kezakun 7. päiväl se sai lidnanvuiččen žilon statusad 2,5 tuhad ristitištonke.
1960-70-nzil vozil zavottihe sauda Čerepovecan GRES:ad lodeheze žilospäi. Nügüd' nece lämuzelektrostancii om žilon da ümbrikon kaikiš suremb edheotand, sen agj om 6 tuh. ristitištonke, mülüb municipaližhe ühtnikha.
Žilonpäiv praznuičese kezan jäl'gmäižel sobatal.
Kadujan ižandusen sarakod oma lämuzenergetik (Čerepovecan GRES 450 MVt vägevudenke), sauvondmaterialiden pästand (metallkonstrukcijad, sauvondblokad, faner), sömtegimišt (vintegim, möukun konserviruind), pumaterialan süvä ümbriradmine (fanerpakuitez, ezitegesed meblin täht), maižanduz, kalankazvatuz. Ende punümbriradai tegim, gofriruidud kartonan tehmine i maidtegim radoiba žilos mugažo.
Geografijan andmused vajehta
Žilo sijadase ümbrikon suvipäivnouzmas, läbipäzmatomiden soiden keskes, Sudanjogen (Volgan bassein) oiktal randpolen da «Čerepovec — Volhov»-raudten keskes. Sudanjogen pen' oiged Voron-ližajogi läbitab žilod. Matkad Vologdhasai om 156 kilometrad päivnouzmha orhal, 172 km avtotedme. Lähembaine lidn om Čerepovec, 44 kilometrad päivnouzmha orhal, 58 km avtotedme. Ümbrikon toine lidnanvuitte Hohlovo-žilo sijadase 15 km päivnouzmha avtotedme, läz A114-trassad.
Klimat om ven kontinentaline. Voden keskmäine lämuz om +3,2 C°, heinkun +17,2 C°, tal'vkun-uhokun −8,1..−10,0 C°.
Kadui jagase videks agjaks: Vanh Kadui (läz raudtestancijad), GRES, DOZ (punümbriradai tegim), Sudan reid i Hutorok («futorut»), niišpäi nell' oma ühtenzoittud rengaztel.
Tobmuz vajehta
Municipaline «Kadui-žilo»-ühtnik oli vll 2006−2022, se mülüti völ koume pen't küläd 119 eläjanke (vl 2016): Čuprino, Koptelovo, Krükovo. Lidnankundan pind oli 67,78 nellikkilometrad. Se om kätud ümbrikon territorialižeks palakundaks vn 2022 kezakuspäi.
Kaik 16 ezitajad mülüiba municipaližen ühtnikan Nevondkundha (ven.: Совет муниципального образования). Valitihe heid järgenduseližen kerdan vn 2013 sügüz'kun 8. päiväl (koumanz' kucund). Heiden valdatusiden strok oli nell' vot. Svetlana Gračova oli nevondkundan ezimehen — Kadujan pämehen vn 2017 redukuspäi. Aleksandr Marčenko radoi nevondkundan edeližen ezimehen.
Lidnankundan Administracijan pämez' oli Vasilii Burlov vn 2018 vilukuspäi. Edeline lidnankundan Administracijan pämez' om Nikolai Ševelöv (kezaku 2005 — viluku 2018). Administracijan südäin oli sen pämehen varapämez' i viž palakundad, kaik oli 16 radnikad.
Eläjad vajehta
Vn 2002 Venäman rahvahanlugemižen mödhe žilon eläjiden lugu oli 11 798 ristitud (kaikiš suremb ristitišt), vn 2010 — 11 291 ristitud, vn 2021 — 11 291 ristitud. Rajonan kaikenaigaižen ristitišton kaks' koumandest eläb žilos. Vl 2017 kaik 11 280 ristitud eliba žilos, i 11 394 ristitud kaikes lidnankundas.
Ortodoksižen hristanuskondan ph. Filipp Irapalaižen puine jumalanpert'[1] om avaitud žilos vl 1998.
Lapsiden opendusen aluzkundad oma kaks' keskškolad, sädamižen lapsidenkeskuz, lapsiden i norišton sportškol. Kadujan energetine kolledž[2] om žilon professionaližen opendusen aluzkundaks. Toižed valdkundaližen büdžetan aluzkundad oma kodirandantedištandmuzei, kul'turpert', fizkul'turiž-tervehtamižkompleks i ujundbassein.
Transport vajehta
Avtotesarak «Vologd — Uz' Ladog»-mantespäi (A114-trassaspäi) tuleb žilho. Avtobusad (nell' maršrutad) i taksid oma kundaližeks transportaks žilon südäimes.
Kadui-raudtestancii radab žilos.
Homaičendad vajehta
Irdkosketused vajehta
| Kadui Vikiaitas |