Belogorsk (Amuran agj)

Belogorsk (ven.: Белого́рск) om Venäman lidn da lidnümbrik Amuran agjan suvipalas. Se om agjan kahtenz' lidn eläjiden lugun mödhe, Belogorskan rajonan administrativižeks keskuseks mugažo (ei mülü rajonha).

Belogorsk
Белогорск
 Lidnanznam
 Flag
Valdkund Venäma
Eläjiden lugu (2023) 60,350 ristitud
Belogorsk Белогорск
Pämez' Stanislav Melükov
(reduku 2008—)
Telefonkod +7−41 641-xx-xxx
Avtokod 28
Aigvö UTC+9 (MSK+6)


Sil sanal voib olda toižid znamoičendoid; miše nähta niid, tulgat tänna.

Istorii vajehta

Eländpunktan aluz om pandud vl 1860 kuti Aleksandrovskoje-žilo sirdanikoil Permin i Vätkan gubernijoišpäi. Se sai lidnan statusad vl 1926. Vspäi 1957 om nügüdläiženke nimenke.

Belogorskan tegimišton päsarakod oma sauvondtegesiden pästand (raudbetontegesed, läbinägujad konstrukcijad), sömtegimišt sijaližel torhudel, raudten edheotandad (distancii, koume depod). Lidn om maižanduzrajonan keskuz. Turizm šingotase Belogorskas, kahesa adivpertid om saudud lidnas.

Geografijan andmused vajehta

Lidn sijadase Tom'-jogen alajoksmusen hural randal (ven.: Томь 433 km pitte, Zejan hura ližajogi), 170 m ü.m.t. keskmäižel korktusel. Belogorsk om Transsiban raudtesol'meks, 109-kilometrine raudtesarak ühtenzoitab Blagoveščenskanke suvipäivlaskmas.

Om 99 km matkad Blagoveščenskhasai avtotedme. Lähembaine lidn om Svobodnii 56 km lodeheze orhal vai raudtedme, 63 km oiktal avtotel vai 109 km «Amur»-avtoted kävutaden.

Klimat om terav kontinentaline mussonižen pirdoidenke. Keza om läm' vihmakaz päivoikaz, tal'v om vilu kuiv. Voden keskmäine lämuz om +0,3 C°, kezakun-elokun +18,8..+20,9 C°, tal'vkun-uhokun −18,3..−24,4 C°.

Tobmuz vajehta

Nizinnoje-žilo (472 rist. vl 2017) mülüb lidnümbrikho Belogorskan ližaks. Lidnümbrikon pind — 117,6 km².

Lidnümbrikon tobmuden pämez' om sen Administracijan pämez'. Lidnümbrikon Rahvahaližiden Deputatoiden nevondkundan ezimez' om Viktorija Gratii vn 2022 tal'vkuspäi, hän-žo radoi sil radnikusel vn 2021 redukuhusai. Vl 2022 Svetlana Trembač i Anna Volkova radoiba Nevondkundan ezimehikš aigkeskustas.

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 68 249 ristitud, lidnümbrikon — 68 716 ristitud. Vn 2021 rahvahanlugemižen mödhe lidnan ristitišt oli 61 440 eläjad. Vl 2017 kaik 66 445 ristitud elihe lidnas i 66 917 ristitud kaikes lidnümbrikos. Kaikiš suremb lidnan ristitišt oli 75 tuhad eläjid vl 1992.

Om kaht ortodoksižen hristanuskondan pühäpertid[1]: Eläban Eziauguižen Stroican jumalanpert' (om sätud anttud sauvusespäi vspäi 2005 enččen ühtennimižen pühäpertin territorijal) i Jumalanmaman «Rigomanahin'»-jumalaižen puine jumalanpert' (om sätud vll 1947−1958 osttud pertišpäi).

Professionaližen opendusen aluzkundad oma sijaline Amuran profkvalifikacijoiden äifunkcionaline keskuz[2] i Amuran torguindan da servisan kolledžan nellänz' palakund (Blagoveščensk, vspäi 2013, enzne Belogorskan sömtegimišton tehnologine tehnikum).

Galerei vajehta

Homaičendad vajehta

  1. Belogorskan pühäpertid sobory.ru-saital. (ven.)
  2. Amuran profkvalifikacijoiden äifunkcionaližen keskusen sait (pksl28.ru). (ven.)

Irdkosketused vajehta



Amuran agjan lidnad
Belogorsk | Blagoveščensk | Ciolkovskii | Raičihinsk | Skovorodino | Svobodnii | Šimanovsk | Zavitinsk | Zei | Tind