Pošehonje (lidn)

Pošehonje (ven.: Пошехо́нье) om Venäman lidn da lidnankund Jaroslavlin agjan pohjoižes. Se om Pošehonjen rajonan administrativine keskuz.

Pošehonje
Пошехонье

Lidnanznam	Flag
Valdkund	Venäma
Eläjiden lugu (2017)	5,867 ristitud
Pind	8,03 km²
Pämez'	Aleksei Rumäncev (keväz'ku 2011—)
Telefonkod	+7−48 546-xx-xxx
Avtokod	76
Aigvö	UTC+3 (MSK+0)

Istorii

Eländpunkt mainitaškanzi kuti Pertom-žilo (ven.: село Пертома, Pertomk-jogen mödhe) vspäi 1680, konz sodavejan kancelärii radaškanzi. Žilo sai Jaroslavlin agjan (gubernijan) makundan lidnan statusad vl 1777 nügüdläiženke nimenke amuižen tahondan mödhe Šeksnanjogen Šehon'-paginnimitusespäi. 19. voz'sadal lidn šingotihe nahkan pramozlal, lehtezkuldan i lehtezhobedan tehmižel, torguindrivil.

Vll 1918−1992 lidnan nimi oli Pošehonje-Volodarsk (ven.: Пошехонье-Володарск) riktud revolücijan V. Volodarskii-šingotajan muštoks. Lidnan landšaft i znamoičend vajehtihe vn 1941 Ribinskan vezivaradimen täutmižen jäl'ghe, laivansauvomine oli šingotadud i sädihe kaks' ut sildad «Čerepovec — Ribinsk»-avtotel surenzoittud jogiš päliči. Pošehonjen saguden sijaline pästand oli 1960−1990-nzil vozil, jäihe vaiše fotokuvid muzejas.

Pošehonje šingotase mecan ümbriradmižel, sömtegimištol (kalategim, leibänedheotand, konditerižed tegesed), maižandusel (lindfabrik), omblendfabrikal da turizmal. Vezituršhan «rezidencii» om avaitud lidnas.

Geografijan andmused

Lidn sijadase Sogož-jogen hural randal (129 km pitte, ven.: Согожа, Volgan hurapol'ne bassein) sen da huran Sog-ližajogen (ven.: Сога) lanktendan (estuarijan) sijas Ribinskan vezivaradimhe (keskmäine tazopind 102 m), 10 kilometras merospäi, 110 m ü.m.t. keskmäižel korktusel. Matkad Jaroslavlihesai om 108 km suvipäivnouzmha orhal vai 136 km avtol. Lähembaine lidn om Ribinsk 53 km suvhe orhal vai 71 km avtotedme.

Pošehonje om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe lidnan eläjiden lugu oli 6 084 ristitud, rajonan kaks' videndest. Kaikiš suremb lidnan ristitišt oli läz 8 tuhad eläjid vll 1959−1996 (8 042 rist. vl 1989). Ortodoksižen hristanuskondan Stroican päjumalanpert' (1717) da Pühän Jumalanmaman Emäganpäivän jumalanpert' (1822) oma väges.

Pošehonjen agrariž-politehnine kolledž om professionaližen opendusen aluzkundaks.

Irdkosketused

• Pošehonjen lidnankundan tobmuden aluzkundoiden oficialine sait (admgorposh.ru). (ven.) (angl.) (saks.)