Harovskan ümbrik

Harovskan ümbrik (ven.: Ха́ровский о́круг) om ümbrik (edel vn 2022 kezakud — rajon) Venäman Vologdan agjas.

Harovskan ümbrik
Харовский округ

Znam	Flag
Valdkund	Venäma
Administrativine keskuz	Harovsk
Eläjiden lugu (2023)	12,976 ristitud
Pind	3,563,67 km²

Administrativine keskuz om Harovsk-lidn, otab ümbrikon ristitišton koumed videndest.

Istorii

Ümbrikon aluz om pandud kut rajon vn 1929 heinkun 15. päiväl Pohjoižen randan Vologdan ümbrikho. Vn 1930 heinkun 30. päiväl heittihe ümbrikod, i vhesai 1936 rajon mülüi Pohjoižhe randha kut administrativine ühtnik, sid' vozil 1936−1937 — Pohjoižhe agjaha. Vn 1937 sügüz'kun 23. päiväspäi om olmas Vologdan agjan palaks. Vozil 1962−1965 Sämžan rajonan territorii oli Harovskan rajonan palaks. Ümbrik om olmas läz nügüdläižiš röunoiš vspäi 2006, vl 2022 sen koume žilod oliba mülütadud Sämžan ümbrikho.

Geografijan andmused

Harovskan ümbrik sijadase Vologdan agjan keskuses. Pind — 3 563,67 nellikkilometrad. Mec otab territorijan nell' videndest (2817 km²), kavag'mec (kuz', pedai) da lehtezmec (koiv, hab) oma levitadud tazomäras.

Om röunoid nellänke Vologdan agjan ümbrikonke:

• päivnouzmas Sämžan ümbrikonke;
• suves Sokolan ümbrikonke;
• päivlaskmas Kubenansun ümbrikonke;
• pohjoižes Vožegan ümbrikonke.

Znamasižed joged oma Kuben da sen oiged Sit'-ližajogi. Läz kaik joged mülüdas Kubenan basseinha, pen' pala suvipäivnouzmas — Suhonan basseinha. Kaik om seičeme järved ümbrikos, Katromanjärv (14,2 km², koumen metrad süvütte) om kaikiš suremb niišpäi. Kaik joged mülüdas Jävaldmeren basseinha.

Reljef om tazo päpaloin, sokaz sijidme. Harovskan kukkazsel'g om ümbrikon keskuses da suvipäivlaskmas.

Londuseližed varad oma turbaz, sauvondmaterialad (mouckivi, letked, gravii, saved), gaž, mec, reskvezi.

Tobmuz

Vn 2015 sulakun 28. päiväspäi rajonan territorii jagoihe kudeks municipaližeks ühtnikaks: üks' lidnankund da viž küläkundad. Vn 2022 kezakuspäi kaik kundad oma kätud ümbrikon territorialižikš palakundoikš.

Vn 2013 sügüz'kun 8. päiväspäi Sergei Popov oli valitud i radoi rajonan da sen administracijan pämehen. Kaik rahvaz änesti händast, valdatusiden strok oli viž vot. Kaik koume administracijan varapämest oliba hänele abhu. Kaik nell' ohjandust, ühesa palakundad, üks' komitet da koume laudkundad alištuiba rajonan administracijale.

Käskusenandai tobmuz om ümbrikon parlament — Municipaline suim (ven.: Муниципальное собрание) 18 ühtnijanke. Kaik rahvaz valičeb heid nelläks vodeks. Järgvaličendad sihe oliba vn 2012 keväz'kun 4. päiväl. Ol'ga Mirolübova radoi sen ezimehen vl 2015.

Eläjad

Vn 2002 Venäman rahvahanlugemižen mödhe rajonan eläjiden lugu oli 20 576 ristitud, vn 2010 — 16 622 ristitud, vn 2021 — 13 151 ristitud. Kaik 14 456 eläjad oli rajonas vl 2017.

Rahvahad (enamba 0,4 % eläjid vl 2021): venälaižed — 96,4 %, toižed rahvahad — 2,1 %, rahvahuden ozutandata — 1,5 %.

Kaik om 379 eländpunktad ümbrikos, niiden kesken üks' lidn, 20 žilod, 357 küläd da üks' Semigorodnäi-raudtestancii, kudamb om ümbrikon toižeks sureks eländpunktaks (1,4 tuh. rist. vl 2010). Niišpäi 172 küläd i viž žilod seištas kaikenaigaižeta ristitištota.

Ižanduz

Ümbrikon ižandusen päsarakod oma mecan varhapanend da ümbriradmine (raudtešpalad, strubad), sauvondmaterialiden tehmine (bazal'tkuid lämuzizoläcijan täht, pilindmaterialad), raudtetransport, sömtegimišt da maižanduz, turizm.

Irdkosketused

• Harovskan ümbrikon administracijan oficialine sait (35kharovskij.gosuslugi.ru). (ven.)
• Harovskan ümbrik agjan oficialižel vologda-oblast.ru-portalal. (ven.) (angl.)