Gdov

Gdov (ven.: Гдов, est.: Oudova) om Venäman lidn Pskovan agjan lodehes. Se om Gdovan rajonan administrativižeks keskuseks da palaks.

Gdov
Гдов

Lidnanznam	Flag
Valdkund	Venäma
Eläjiden lugu (2025)	3,194 ristitud
Pind	5 km²
Pämez'	Ol'ga Galahova (reduku 2020—)
Telefonkod	+7−81 131-xx-xxx
Avtokod	60
Aigvö	UTC+3 (MSK+0)

Istorii

Eländpunkt mainitase ezmäižen kerdan Pskovan ezmäižes aigkirjas vl 1322. Saudihe kivišt lidnust vl 1431. Lidnuz kadoti kaičendznamoičendad Pohjoižen sodan jäl'ghe (1700−1721), sirtihe valdkundröunad päivlaskmha. Lidnusen koume seinäd nelläspäi oma kaičenus paloin.

Žilo oli Piterin (Ingrijan) gubernijan makundan keskuseks vspäi 1708. Gdov sai lidnan oficiališt statusad vl 1780. Vozil 1941 (19. heinku) — 1944 (4. uhoku) lidn oli okkupuruidud nacistižen Germanijan sodavägil.

Gdov šingotase valdkundaližil holitišil i sömtegimištol: kalanümbriradai tegim, maidtegim, paštatesen edheotand, veden pakuitez.

Geografijan andmused

Lidn sijadase valdkundröunanno, Peipusjärven päivnouzmaižel randpolel, ühtes kilometras randaspäi, 40 m ü.m.t. keskmäižel korktusel.

Matkad Pskovhasai om 105 km suvhe orhal vai 115 km avtotedme. Kävutamatoi Gdov-raudtestancii om saudud lidnan pohjoižpäivnouzmas, raudte tuleb lähembaižes Slanci-lidnaspäi (Leningradan agj, 45 km) i se om konservacijas.

Klimat om ven meren, kontinentaližen pirdoidenke. Voden keskmäine lämuz om +5,6 C°, kezakun-elokun +15,4..+17,8 C°, tal'vkun-uhokun −3,7..−5,7 C°. Paneb sadegid 645 mm vodes, enamba kezakus-elokus (74..89 mm kus), vähemba uhokus-sulakus (28..33 mm kus).

Tobmuz

Gdovan sijaduz municipalitetas i rajonas vn 2010 kartal

Kaik 61 külä da üks' futor mülüdas lidnankundha Gdovan ližaks. Lidnankundan pind om 329,83 nellikkilometrad.

Lidnankundan tobmuden pämez' om sen Deputatoiden suiman ezimez'. Edeline suiman ezimez' om Vera Kabanova (kül'mku 2015 — reduku 2020). Lidnankundan Administracijan pämez' om Ol'ga Sokolova vn 2021 vilukuspäi. Edeližed lidnan Administracijan pämehed oma Julija Kuznecova (kül'mku 2017 — tal'vku 2020), Jurii Pavlov (radoi vn 2017 kül'mkuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 4 421 ristitud (rajonan ristitišton koumandez), lidnankundan — 6263 ristitud, vn 2021 lidnan — 3 465 ristitud. Vl 2017 kaik 3 542 ristitud elihe lidnas i 5 484 ristitud kaikes lidnankundas. Kaikiš suremb lidnan ristitišt oli 5 966 eläjad vl 1989.

Rahvahad (enamba 0,4 % vl 2021): venälaižed — 96,2 %, ukrainalaižed — 0,5 %, armenijalaižed — 0,5 %, čiganalaižed — 0,4 %, toižed rahvahad — 1,5 %, rahvahuden ozutandata — 0,9 %.

Ortodoksižen hristanuskondan Pühän Jumalanmaman «Tatanmaine»-jumalaižen päjumalanpert' om saudud lidnas vll 1989−1993. Kuz' jumalanpertid ei ole kaičenus, ned oliba pandud mantazole vll 1933−1959 kommunistižen tobmuden, Suren sodan i lämoipalon tagut.

Lapsiden opendusen aluzkundad oma päivkodi nomer 4, Gdovan keskškol, lapsiden sädamižen pert', muzikškol. Professionaližen opendusen aluzkundad ratas lähembaižiš lidnoiš.

Galerei

• 
  Gdovan rajonan käskuzkundan sauvuz (2021)
• 
  Pühän Jumalanmaman «Tatanmaine»-jumalaižen päjumalanpert', vn 2018 nägu
• 
  Lidnan universaline lauk vl 2021
• 
  Kul'turkeskuz (2021)
• 
  Gdovan agjan istorijan muzei vl 2021
• 
  Istorine lidnanznam

Irdkosketused

• Lidnankundan lehtpoled Gdovan rajonan tobmuden aluzkundoiden saital (gdov.reg60.ru). (ven.)