Dät'kovo (ven.: Дя́тьково) om Venäman lidn da lidnankund Bränskan agjan pohjoižpäivnouzmas. Se om Dät'kovon rajonan administrativine keskuz.

Dät'kovo
Дятьково
Lidnanznam
Valdkund Venäma
Eläjiden lugu (2021) 25,255 ristitud
Dät'kovo Дятьково
Pämez' Sergei Lukjanenko
(reduku 2014—)
Telefonkod +7−48 333-xx-xxx
Avtokod 32
Aigvö UTC+3 (MSK+0)

Istorii vajehta

Eländpunkt mainitase ezmäižen kerdan vl 1626 kuti külä, vspäi 1810 oli žiloks. Vl 1924 kätihe lidnanvuiččeks žiloks. Vspäi 1938 om lidnan statusanke. Municipaližen «Dät'kovo»-ühtnikan administracii om likvidiruidud vn 2014 redukus, rajonan administracii tegeb sen velgusidme.

Dät'kovo šingotase hrustalin da meblin tehmižel, sauvondmaterialiden (raudbetonkonstrukcijad, keradajad puižed pertid) i sömtegimišton edheotandad ratas, mugažo releiden tegim om saudud.

Geografijan andmused vajehta

Lidn sijadase penen Olešn'-jogen randoil (ven.: Олешня), se lankteb lidnan taga vides kilometras Bolv-jogehe oiktalpäi (ven.: Болва 213 km pitte, Desnan hura ližajogi), 200 m ü.m.t. keskmäižel korktusel. Matkad Kalugan agjan röunhasai om kuz' kilometrad päivnouzmha orhal, Bränskhasai om 25 km suvhe teidme. Dät'kovo-raudtestancii om olmas vspäi 1927 lidnan pohjoižes.

Kaik nell' küläd da Vereščovk-raudtestancii mülüdas lidnankundha Dät'kovon ližaks. Lidnankundan pind — 190,26 km².

Eläjad vajehta

Vn 2010 Venäman rahvahanlugemižen mödhe lidnan eläjiden lugu oli 29 439 ristitud, lidnankundan — 29 588 ristitud, rajonan nell' ühesandest. Kaikiš suremb lidnan ristitišt oli 34..35 tuhad vozil 1989−2001 (35 000 rist. vl 1992). Vl 2017 kaik 27 028 ristitud elihe lidnas i 27 283 ristitud kaikes lidnankundas.

Ortodoksižen hristanuskondan nell' pühäpertid[1] oma saudud lidnas: koume jumalanpertid i časoun'. Baptizman «Nadežda»-loičendpert' («toiv») om avaitud.

Bränskan energomašiništonsauvomižen da radioelektronikan tehnikuman filial[2] (edel 2016. vot — Dät'kovon industrialine tehnikum) om lidnan professionaližen opendusen aluzkundaks.

Lidnankundan Rahvahandeputatoiden nevondkundan ezimez' om lidnan pämez'.

Galerei vajehta

Homaičendad vajehta

  1. Dät'kovon pühäpertid sobory.ru-saital. (ven.)
  2. Dät'kovon filial Bränskan energomašiništonsauvomižen da radioelektronikan tehnikuman бтэир.рф-saital.) (ven.)

Irdkosketused vajehta



Bränskan agjan lidnad
Bränsk | Dät'kovo | Fokino | Karačev | Klincad | Mglin | Novozibkov | Počep | Sel'co | Sevsk | Starodub | Suraž | Zlink | Žukovk | Trubčevsk | Uneč