Ploješti

Ploješti (rom.: Ploiești [ploˈjeʃtʲ]) om lidn Romanijan suves. Se om Prahovan ümbrikon administrativine keskuz.

Ploješti
Ploiești

Lidnanznam	Flag
Valdkund	Romanii
Eläjiden lugu (2021)	180,540 ristitud
Pind	58,28 km²
Pämez'	Andrei Voloseviči (2008−2012, reduku 2020 — 2024, Andrei Volosevici)
Telefonkod	+40-(0)244/344
Aigvö	tal'vel UTC+2, kezal UTC+3

Ploješti ezilidnoidenke vl 2009 (territorijoiden pindad)

Istorii

Eländpunktan aluz om pandud vl 1596 Valahijan Mihai Rohked-valdoičijan ohjandusen aigan (1593−1601). Lidn kändihe torguindan da käzitöiden edheotandoiden keskuseks 17.-18. voz'sadoil. Kivivoin samižen keskuz 19. voz'sadan keskespäi.

Karpatan manrehkaiduz mureni lidnad lujas vn 1940 10. kül'mkud. Ploještin region oli kivivoin päpurtkeks nacistižen Germanijan täht Toižen mail'man sodan aigan. Nevondkundaline armii anasti Ploještid vn 1944 24. elokud. Tekstil'tegimišton radmižen hätk istorii om lidnas.

Ploješti šingotase kivivoin samižel da sen ümbriradmižel tähäsai (nell' tegint ezilidnoidenke), Unilever-kompanijan pezendsubstancijoiden tegimel.

Geografijan andmused

Lidn sijadase Dambu-jogen randal (rom.: Dâmbu 39 km pitte, Prahovan i Dunain bassein), 165 m ü.m.t. keskmäižel korktusel. Matkad Buharestan rengazavtotehesai om 56 km suvhe avtol.

Klimat om ven kontinentaline räkanke kezanke, Buharest-pälidnan klimatan pojav. Voden keskmäine lämuz om +10,5 C°. Ekstremumad oma −30 C° (viluku) i +43 C° (heinku). Paneb sadegid 600 mm vodes, enamba semendkus-elokus (58..76 mm kus), vähemba redukus (33 mm) i uhokus-keväz'kus (36..38 mm kus).

Eläjad

Vl 1941 lidnan ristitišt oli 107 068 eläjad. Vn 2002 Romanijan rahvahanlugemižen mödhe lidnan eläjiden lugu oli 232 527 eläjad, vl 2011 — 209 945 ristitud. Kaikiš suremb lidnan ristitišt oli 252 715 eläjad vl 1992. Kaik 266 457 eläjad om ezilidnoidenke (2021).

Rahvahad (2011): romanijalaižed — 90,6 %, čiganalaižed — 2,4 %, toižed rahvahad — 0,3 %, rahvahuden ozutandata — 6,7 %.

Uskondan mödhe eläjiden 90,7 % oma ortodoksižed hristanuskojad (2011).

Kaik kaks' universitetad ratas lidnas: kivivoin da gazan (vspäi 1948) i George Baritiun nimed (alusenpanend 2002). Niiden ližaks, seičeme kolledžad i viž üläškolad anttas opendust lidnas. Znamasine om Ploještin kivivoin da gazan universitet (rom.: Universitatea Petrol-Gaze din Ploiești), edel vn 1993. vot institut, siš om 8,6 tuh. üläopenikoid (2012/13 openduzvodel), viž fakul'tetad.

Transport

Avtobusad (33 maršrutad), trolleibusad (kaks' jonod) i tramvaid (kaks' jonod) oma kundaližeks transportaks lidnas. Znamasine raudtesol'm sijadase lidnas. Valdkundan A3-mante läbitab lidnad.

Rahvahidenkeskeine soda- da civiline Buharestan lendimport Anri Koandan nimed (OTP / LROP, 14,6 mln passažiroid vl 2023) sijadase 45 kilometras suvhe lidnaspäi, nelläs kilometras pohjoižhe pälidnan röunalpäi.

Galerei

• 
  Lidnan ohjandusen pert', ende valdkundan kaikiš suremban Petrom-kompanijan päfater, 2008
• 
  Ph. Ioann-Valatajan päjumalanpert' (ortodoksine hristanuskond), vn 2010 nägu
• 
  Kivivoinumbriradmižen Petrotel-Lukoil-tegimen nägu vl 2009
• 
  Kivivoinumbriradmižen Vega-tegimen nägu vl 2009
• 
  Ploještin čomamahton muzei (2012)

Irdkosketused

• Lidnan oficialine sait (ploiesti.ro). (rom.) (angl.)