Ostrav

Ostrav (čeh.: Ostrava [ˈɔstrava], silez.: Uostrawa, pol'š.: Ostrawa, saks.: Ostrau) om Čehanman koumanz' surtte lidn eläjiden lugun mödhe. Se om Moravijan da Silezijan randan administrativine keskuz, sijadase valdkundan i randan päivnouzmas.

Ostrav
Ostrava

Lidnanznam	Flag
Valdkund	Čehanma
Eläjiden lugu (2023)	283,504 ristitud
Pind	214,23 km²
Pämez'	Tomaš Macura (kül'mku 2014—, Tomáš Macura)
Telefonkod	+420
Avtokod	T
Aigvö	tal'vel UTC+1, kezal UTC+2

Istorii

Eländpunktan aluz om pandud vl 1267. Löutihe korgedladušt kivihil't vl 1763, i 20. voz'sadal lidn oli sen samižen da raudan metallurgijan järedaks keskuseks.

Vl 1994 hilen samine om seižutadud, no koksan i terasen tegimed jätktas radod. 2000-nzil vozil metallurgijan tegimed oma mödud verazmaižile kompanijoile (ArcelorMittal da tž.).

Geografijan andmused

Lidn sijadase Oder-jogen randal, 260 m ü.m.t. keskmäižel korktusel. Koume tošt joged om lidnas: Opav (Opava 111 km pitte) lankteb Oderha huralpäi, Ostravice (64 km pitte) oiktalpäi, Lučin (Lučina 37 km pitte) jokseb Ostravicen ližajogeks. Matkad Praghasai om 370 km päivlaskmha, Pol'šanman röunhasai — 15 km pohjoižhe, Slovakijahasai om 55 km suvipäivnouzmha.

Klimat om ven kontinentaline, valdmeren valatoitusenke. Voden keskmäine lämuz om +9,6 C°, kezakun-elokun +18,1..+19,9 C°, tal'vkun-uhokun −0,6...+0,7 C°. Ekstremumad oma −29,7 C° (viluku, tal'vku) i +36,9 C° (heinku, uhoku). Paneb sadegid 673 mm vodes, enamba semendkus-heinkus (84..96 mm kus), vähemba tal'vkus-keväz'kus (26..34 mm kus).

Eläjad

Vn 2011 Čehanman rahvahanlugemižen mödhe lidnan eläjiden lugu oli 296 224 ristitud. Kaikiš suremb lidnan ristitišt oli 327 371 eläjad vl 1991. Lidn om Čehanman kahtenden surtte aglomeracijan keskuz, 1,15 mln eläjid (2004).

Kaik koume universitetad ratas lidnas: Kaivuzmetallurgine üläškol — Ostravan tehnine universitet (10 tuh. üläopenikoid vl 2020, alusenpanend 1849), Ostravan universitet, Ostravan biznesškol.

Irdkosketused

• Lidnan oficialine sait (ostrava.cz). (angl.) (čeh.)