Krasnokamsk

Krasnokamsk (ven.: Краснока́мск, perm. komi: Краснокамск) om Venäman lidn da lidnankund Permin randan keskuzpalan suves. Se om Permin päivlaskmaine kaimdailidn da Krasnokamskan lidnümbrikon (edel 2018. vot — rajonan) administrativine keskuz.

Krasnokamsk
Краснокамск

Lidnanznam	Flag
Valdkund	Venäma
Eläjiden lugu (2023)	47,968 ristitud
Pind	95,8 km²
Telefonkod	+7−34 273-xx-xxx
Avtokod	59, 81, 159
Aigvö	UTC+5 (MSK+2)

Istorii

Eländpunktan aluz om pandud vl 1929 kuti Bumstroi-žilo (ven.: посёлок Бумстрой) sauvomha kaikiš järedambad cellülozbumagašt kombinatad Evropas sil aigal. Kätihe žilod lidnanvuiččeks vl 1933 da nimitihe nügüdläižikš. Krasnokamsk sai lidnan statusad vl 1938.

Toižen mail'man sodan aigan Leningradan monettegim oli sirtud sihe, pästtihe ordenoid da mötalid. Ei ulotund tegimen vägevut, sen tagut sätihe mugošt tegint Moskvas-ki.

Krasnokamskan ižandusen päsarakod oma bumagan tehmine da kivivoin samine. Valdkundaližen «Goznak»-edheotandan Krasnokamskan fabrik tegeb bumagan eriližid toižendoid. Lidnan i Permin edheotandoiden sidod oma vahvad. Kävutadas valdmoid Kam-jogen randal vedamha jüguid.

Geografijan andmused

Lidn sijadase Kam-jogen oiktal randal Permin röunan taga ani, 100 m ü.m.t. keskmäižel korktusel. Nened ližajoged lanktas Kamha lidnan territorijal: Pen' Las'v (ven.: Малая Ласьва) 18 km pitte, Pal't (Пальта) 17 km pitte, mugažo Las'v (Ласьва) 78 km pitte lankteb Kamha lidnan i Permin keskes.

Matkad Permin keskushesai om 34 km raudtel vai 35 km avtotel.

Tobmuz

Krasnokamsk oli lidnankundan (2004−2018) üks'jäižeks eländpunktaks. Vl 2018 lidnankund om kätud ümbrikon territorialižeks palakundaks. Kaik 13 oficialižetont mikrorajonad lugetas lidnas.

Lidnankundan tobmuden pämez' oli sen Administracijan pämez'. Jäl'gmäine lidnan pämez' om Julija Potapova (sulaku 2016 — tal'vku 2018). Lidnankundan Administracii om likvidiruidud vn 2019 semendkus, Dum — sen-žo voden vilukus. Galina Ušakova radoi lidnan Duman jäl'gmäižen ezimehen vn 2018 sügüz'kuhusai.

Eläjad

Vn 2010 Venämen rahvahanlugemižen mödhe lidnan eläjiden lugu oli 51 916 ristitud, rajonan koume nelländest, vn 2021 — 48 778 ristitud. Kaik 53 864 eläjad oli lidnas vl 2017. Vspäi 1959 lidnan ristitišt om 52..58 tuhad röunoiš, kaikiš suremb oli 58 tuhad eläjid vl 1987.

Ortodoksižen hristanuskondan nell' pühäpertid ratas lidnas: ph. Jekaterina Aleksandrijalaine-moknikan jumalanpert' (om saudud vll 2000−2005), kodijumalanpert' i kaks' časounäd. Islaman pühäpert' om avaitud lidnas.

Krasnokamskan politehnine tehnikum om lidnan professionaližen opendusen aluzkundaks.

Galerei

• 
  Lidnan kodirandantedištandmuzei (2015)
• 
  Jumalanmaman «Lopmätoi Mall'»-jumalaižen časoun', vn 2015 nägu
• 
  Сellülozbumagaižen «Kama»-kombinatan kontor vl 2016
• 
  «Kedrovii dom»-adivpert' (2012, Kedrasine pert')
• 
  Kaman randird lidnas vl 2013

Irdkosketused

• Lidnümbrikon oficialine sait (krasnokamsk.ru). (ven.)