Kauhav

Kauhav (suom. i roč.: Kauhava) om Suomenman lidn da lidnankund valdkundan päivlaskmas. Se om Suvipohjanma-agjan koumanz' lidnankund kahesaspäi eläjiden lugun mödhe.

Kauhav
Kauhava (suom. i roč.)

Lidnanznam
Valdkund	Suomenma
Eläjiden lugu (2020)	15,716 ristitud
Pind	1,328,38 km²
Pämez'	Vesa Rantala (viluku 2023—)
Telefonkod	+358-
Aigvö	tal'vel UTC+2, kezal UTC+3

Istorii

Ezmäižed küläd nügüdläižen lidnankundan territorijal mainitasoiš 16. voz'sadaspäi. Municipalitetan aluz om pandud vl 1867, nimitihe jogen mödhe ezimeletaden. Kund sai lidnan statusad vl 1986. Vspäi 2009 enččed Alahärmä, Ülihärmä i Kortesjärvi-municipalitetad mülüdas lidnankundha.

Kauhav šingotase mašinansauvomižel («MSK Group», «Lillbacka Powerco Oy» da toižed), sauvondmaterialiden pästandal (iknad, uksed — «Skaala IFN Oy»), meblin edheotandal («Unico Finland Oy») i puukko-veičiden fabrikal («Iisakki Järvenpää Oy» vspäi 1879, ende oli viž edheotandad). «Powerpark»-bobuštuzkeskuz kartingan trassanke ratas lidnas. Veičiden jogavozne rahvahidenkeskeine festival' mäneb kezakus. Lihaživatvodind i hernhen kazvatand oma lidnankundas.

Geografijan andmused

Lidn sijadase agjan pohjoižes, Kauhavanjogen randoil (suom.: Kauhavanjoki 40 km pitte, Lapuanjogen oiged ližajogi). Matkad lidnaspäi agjan Seinjogi-keskushesai om 37 km suvhe avtotedme vai raudtedme, Hel'sinkihesai om 340 km suvhe-suvipäivnouzmha orhal, 396 km avtol vai raudtel. Lähembaine lidn om Lapua 17 km suvhe avtol vai jonusel.

Vl 2020 lidnan ühthine pind — 1 328,38 km², sidä kesken kuivma 1 313,79 km², vezi i sokaz tahond otiba 14,59 nellikkilometrad.

Eläjad

Vl 1980 lidnankundan eläjiden lugu oli 19 924 ristitud, vl 2010 — 17 308 ristitud. Kaikiš suremb ristitišt oli 20 359 eläjad vl 1985. Ristituiden kaks' videndest eläb lidnankundan keskuses.

Mamankelen mödhe (2016): suomen kel' — 96,7 %, ročin kel' — 0,6 %, toižed keled — 2,7 %.

Edeližed lidnanpämehed oma Markku Lumio (radoi vn 2015 vilukuspäi), Harri Mattila (2009−2014).

Galerei

• 
  Lidnankundan ohjastusen pert' (2017)
• 
  Kauhavan jumalanpert', vn 2017 nägu
• 
  Äifunkcionaline «POP Areena» (2018)
• 
  Kauhavan raudtestancijan sauvuz vl 2017

Irdkosketused

• Lidnankundan oficialine sait (kauhava.fi). (suom.) (roč.) (angl.)